ރޭ ހުޅުމާލޭގައި ބޭއްވުނު ޓެކްސީ ޑްރައިވަރުންގެ އިހުތިޖާޖާ ގުޅިގެން ބަންދަށް ފަސް ދުވަސް ޖެހި ދެ ޑްރައިވަރުންގެ ބަންދު އަމުރު ހައިކޯޓުގައި އިސްތިއުނާފުކޮށްފިއެވެ.
އިއްޔެ އިރުއޮއްސުނު ވަގުތު ފެށުނު އިހުތިޖާޖަކީ، ސަރުކާރަށް އަހަރު ފުރުނުއިރުވެސް އެ ޑްރައިވަރުންގެ ކަންބޮޑުވުންތަކަށް އެއްވެސް ހައްލެއް ގެނެސްދީފައިނުވާތީ ކުރި އިހުތިޖާޖެކެވެ. އިހުތިޖާޖު ހޫނުވެގެން ދިޔައީ ޑްރައިވަރުންގެ ޑިމާންޑުތަކަށް ޖަވާބު ލިބުމެއްނެތި ގިނައިރުވެ، ހުޅުމާލެއިން ހައިވޭއަށް އެރެން އޮންނަ މަގު އެ ފަރާތްތަކުން ބަންދުކުރުމާ ގުޅިގެންނެވެ. އެކަމުގެ ސަބަބުން މުޅި ސަރަހައްދުގެ ޓްރެފިކް ބްލޮކްވެ، ތޮއްޖެހުނެވެ.
މި މައްސަލައިގައި މުޙައްމަދު ޝާމިން (39އ، މއ. ވިރާހު)، އަހުމަދު ޝަބީން (33އ، ސަންރޭ، ލ. ދަނބިދޫ) އަދި ނުއުމާން އަހުމަދު (36އ، ހޮލިޑޭވިލެޖް، ހދ. ކުމުންދޫ) އާއެކު ތިން މީހަކު ހައްޔަރުކުރެވުނެވެ. މީގެ ތެރެއިން ޝާމިން އާއި ޝަބީން ފަސް ދުވަހުގެ މުއްދަތަށް ބަންދުގައި ބޭތިއްބުމަށް ކޯޓުން އަމުރުކުރި އިރު، ނުއުމާން ވަނީ ޝަރުތުތަކާއެކު ދޫކޮށްލައިފައެވެ.
