މާލޭގައި މިއަދު ހިނގި އަލިފާނުގެ ހާދިސާގައި ހައުސިން މިނިސްޓްރީގެ އިމާރާތަށް ލިބުނު ގެއްލުމާ ގުޅިގެން، މާލޭ ރައްޔިތުންނާއި ގުޅުންހުރި މުހިންމު ލިޔެކިޔުމެއް ގެއްލިގެން ދިއުމުގެ ބިރު އުފެދިއްޖެއެވެ. މި އިމާރާތުގައި މާލޭ ސިޓީ ކައުންސިލުން ހިންގަމުން އައި ވައިޓަލް ސެކްޝަނާއި، ލޭންޑް ސެކްޝަނާއި، ބިލްޑިން ސެކްޝަނަށް ބޮޑެތި ގެއްލުންތަކެއް ލިބި، މުޅި އިމާރާތް ވަނީ ބޭނުން ނުކުރެވޭ ވަރަށް އަނދައިފައެވެ.
މި ހާދިސާއާ ގުޅިގެން މާލޭ ސިޓީ ކައުންސިލުން ބުނެފައިވަނީ، އަލިފާނުގެ އަސަރުކުރި އިމާރާތުގައި ހުރީ މާލޭ ރައްޔިތުންގެ އުފަން ދުވަހުގެ ރިކޯޑުތަކާއި، ރަށްވެހިކަމުގެ ސެޓްފިކެޓްތަކާއި، ގޯތިގެދޮރުގެ ރަޖިސްޓްރީތަކާއި، އިމާރާތުގެ ހުއްދަތައް ފަދަ މުހިންމު ލިޔެކިޔުންތައް ކަމުގައެވެ. އޭގެ ތެރެއިން ބައެއް ލިޔުންތައް ވަނީ އެއްކޮށް އަނދައިގެން ގޮސްފައެވެ.
މާލޭ ސިޓީ ކައުންސިލްގެ މެމްބަރު ސައިފް ފާތިހު ބައެއް މީޑިއާތަކަށް މައުލޫމާތު ދެއްވަމުން ވިދާޅުވި ގޮތުގައި، މި ލިޔެކިޔުންތަކުގެ ތެރެއިން ބައެއް ތަކެތި އިޔާދަ ކުރެވޭނެ ނަމަވެސް، އަނެއްބައި ތަކެތި އިޔާދަ ނުކުރެވޭނެއެވެ. އެގޮތުން ފަހުގެ އުފަންދުވަހުގެ ސެޓްފިކެޓްތަކަކީ ޑީއެންއާރު މެދުވެރިކޮށް ހައްދާފައިވާ ތަކެތި ކަމުން އެ ލިޔުންތައް އަލުން ހޯދުމަކީ ކުރެވޭނެ ކަމެކެވެ. ނަމަވެސް ކުރީގެ ބައެއް ރިކޯޑުތަކަކީ ސްކޭން ކުރެވިފައިނުވާ ތަކެތި ކަމުން އެ ލިޔުންތައް އިޔާދަ ނުކުރެވޭނެކަން އޭނާ ފާހަގަކުރެއްވިއެވެ.
މިވަގުތު ކުރިއަށް ދަނީ އިމާރާތުގައި ހުރި ލިޔެކިޔުންތައް ނެރުމުގެ މަސައްކަތް ކަމަށާއި، މިހާތަނަށް ގާތްގަނޑަކަށް 40 އިންސައްތަ ލިޔެކިޔުން ނެރެވިފައިވާ ކަމަށް ސައިފް ވިދާޅުވިއެވެ. އަދި ގެއްލުން ލިބުނު ލިޔެކިޔުންތަކުގެ ތަފްސީލު އެނގޭނީ ހުރިހާ ލިޔެކިޔުމެއް ނެރުމަށްފަހު ކަމަށްވެސް އޭނާ ވިދާޅުވިއެވެ.
ލިޔެކިޔުންތަކަށް ލިބުނު ގެއްލުމުގެ ތެރޭގައި އަލިފާނުގެ އަސަރުގެ އިތުރުން، އަލިފާން ނިއްވުމަށް ބޭނުންކުރި ފެނުގެ ސަބަބުން ވެސް ލިޔެކިޔުންތަކަށް ބޮޑެތި ގެއްލުންތަކެއް ލިބި، ބައެއް ލިޔުންތައް ވަނީ ޗަސްވެފައެވެ.
މި ހާދިސާގައި ހައުސިން މިނިސްޓްރީގެ އިތުރުން އިންފްރާސްޓްރަކްޗަރ މިނިސްޓްރީއާއި އެންވަޔަރަންމަންޓް މިނިސްޓްރީއަށްވެސް ބޮޑެތި ގެއްލުންތަކެއް ލިބި، މި ތިން މިނިސްޓްރީގެ މަސައްކަތްތައް ވަނީ ވަގުތީގޮތުން ހުއްޓުމަކަށް އައިސްފައެވެ. ނަމަވެސް މި ހާދިސާ ހިނގަން މެދުވެރިވި ސަބަބެއް އަދި ކަމާބެހޭ އެއްވެސް އިދާރާއަކުން ހާމައެއް ނުކުރެއެވެ.
