ހައުސިން މިނިސްޓްރީއާއި އިންފްރާސްޓްރަކްޗަރ މިނިސްޓްރީގައި މިއަދު ރޯވެފައިވާ އަލިފާނުގެ ސަބަބުން ގެދޮރުވެރިޔާ ސްކީމުގެ ދަށުން އެކުލަވާލާފައިވާ ފުލެޓު ލިސްޓަށް އެއްވެސް އަސަރެއް ނުކުރާނެކަން ހައުސިން މިނިސްޓްރީން ވަނީ ކަށަވަރުކޮށްދީފިއެވެ.
މި ހާދިސާއާ ގުޅިގެން ހައުސިން މިނިސްޓްރީން ނެރުނު ބަޔާނުގައި ބުނެފައިވަނީ، ސިފައިންގެ ފަޔަރ ޑިޕާޓްމަންޓުން އަދިވެސް އަލިފާން ނިއްވުމުގެ މަސައްކަތް ކުރިއަށްދާ ކަމަށާއި، މި ހާދިސާގައި އެއްވެސް މުވައްޒަފަކަށް އަނިޔާއެއް ވެފައިނުވާ ކަމަށެވެ. ފުލެޓު ލިސްޓާ ބެހޭ މައުލޫމާތުތަކަކީ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓަމުންދާ މައުލޫމާތުތަކެއް ކަމަށްވުމާއެކު، މިއަދުގެ ހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެކަންވެސް ވަނީ ހާމަކޮށްފައެވެ.
ހާދިސާއާ ގުޅިގެން ސަލާމަތީ ޚިދުމަތްތަކާއެކު މަސައްކަތްތައް ކުރިއަށްދާ ކަމަށާއި، އިތުރު ތަފްސީލު ކުރިއަށް އޮތްތަނުގައި ހިއްސާކުރަމުން ގެންދާނެ ކަމަށް ހައުސިން މިނިސްޓްރީން ބުނެފައިވެއެވެ. އަލިފާން ރޯވުމާ ގުޅިގެން އެ އިމާރާތާއި އިންވެގެން ހުރި އިމާރާތްތަކުގައި މަސައްކަތްކުރަމުންދިޔަ މުވައްޒަފުން ވަނީ ނެރެފައެވެ. އަދި އެ ސަރަހައްދުގައި ސަރުކާރުގެ އިސްވެރިންވެސް ދަނީ ހަރަކާތްތެރިވަމުންނެވެ.
"އަދަދު" ނޫހުގެ ނޫސްވެރިޔަކު މައުލޫމާތު ދިންގޮތުގައި، އަލިފާނުގެ އަސަރު އެންމެ ބޮޑަށް ކޮށްފައިވަނީ ހައުސިންގ އާއި އިންފްރާސްޓްރަކްޗަރ މިނިސްޓްރީގެ ޓިނުން ހަދާފައިވާ އިމާރާތަށެވެ. އެ އިމާރާތަށް ލިބުނު ގެއްލުމުގެ ސަބަބުން މިހާރު އެ އިމާރާތް ވަނީ ބިމާ ހަމަވާން ކައިރިވެފައެވެ.
