އިސްލާމިކް މިނިސްޓްރީން ރަމަޟާން މަހުގެ ތަރާވީހު ނަމާދުގެ އިންތިޒާމުތައް އިޢުލާން ކޮށްފިއެވެ. މާލޭގެ އެންމެ ބޮޑު ދެ މިސްކިތް ކަމުގައިވާ މަސްޖިދުއް ސުލްތާން މުހައްމަދު ތަކުރުފާނުލް އައުޒަމް (އިސްލާމީ މަރުކަޒު) އާއި މަސްޖިދު މަލިކު ސަލްމާންގައި ތަރާވީހު ނަމާދު ކުރާ ހާފިޒުންނަށް ރެޔަކަށް 700 ރުފިޔާ ދޭގޮތަށް ހަމަޖެހިފައިވެއެވެ.
މިނިސްޓްރީގެ ބަޔާނުގައި ވާގޮތުން، މި ދެ މިސްކިތުގައި އިމާމުވެ ތަރާވީހު ނަމާދު ކުރާނީ ދިވެހި ހާފިޒުންނެވެ. އަދި ކޮންމެ މިސްކިތަކަށްވެސް ދެވޭނީ ގިނަވެގެން ދެ ހާފިޒުންގެ ފުރުސަތެވެ. މާލޭގެ އެހެން މިސްކިތްތަކާއި ރަށްރަށުގެ މިސްކިތްތަކުގައި ތަރާވީހު ނަމާދު ކުރާ ހާފިޒުންނަށް ރެޔަކަށް 500 ރުފިޔާ ލިބޭނެއެވެ.
ހާފިޒުން ހޮވުމަށްޓަކައި ޓެސްޓެއް ބޭއްވުމަށް ވަނީ ހަމަޖެހިފައެވެ. މި ޓެސްޓުން އެންމެ މޮޅު ހަތަރު ފަރާތެއް ހޮވޭނެކަމަށް މިނިސްޓްރީން މަޢުލޫމާތު ދެއެވެ. މާލޭގެ މިސްކިތްތަކުގައި ތަރާވީހު ނަމާދު ކުރުމަށް ޝައުޤުވެރިވާ ފަރާތްތަކުން ޖަނަވަރީ 20 ވަނަ ދުވަހުގެ މެންދުރުފަހު 2:00 ގެ ކުރިން ފޯމު ހުށަހަޅަންވާނެއެވެ.
