އަންނަ އަހަރުގެ ރަމަޟާން މަހު "ނޫރުލް އަޛާން 1446″ ގެ ނަމުގައި ބަންގި މުބާރާތެއް ބޭއްވުމަށް ނިންމަވާފައިވާކަން އިސްލާމީ ކަންތައްތަކާއި ބެހޭ ވުޒާރާއިން މިއަދު ހާމަކޮށްފިއެވެ. މި މުބާރާތަކީ އެވުޒާރާގެ މޮސްކް ސެކްޝަނުން އިންތިޒާމު ކުރާ، އުމުރުން 15 އަހަރާއި 20 އަހަރާ ދެމެދުގެ ޒުވާނުންނަށް އަމާޒުކޮށްގެން މާލެ ސިޓީގައި ބާއްވާ މުބާރާތެކެވެ.
މި މުބާރާތުގެ އޮޑިޝަން ބާއްވަން ހަމަޖެހިފައިވަނީ 2025 ވަނަ އަހަރުގެ ޖެނުއަރީ މަހުގެ 15 އިން 30 އަށެވެ. މި އޮޑިޝަންގައި ބައިވެރިވެވޭނީ އުމުރުން 14 އަހަރު ފުރި، 21 އަހަރު ނުވާ ފަރާތްތަކަށް ކަމަށް އެވުޒާރާއިން ވަނީ ހާމަކުރައްވާފައެވެ.
ނޫރުލް އަޛާން 1446 ގައި ބައިވެރިވުމަށް ޝައުގުވެރިވާ ފަރާތްތަކުން، އެކަމަށް ޚާއްޞަ ކުރެވިފައިވާ "ނޫރުލް އަޛާން 1446 ގައި ބައިވެރިވުމުގެ ފޯމު" ފުރިހަމަކޮށް ހުށަހަޅަން ޖެހޭނެއެވެ. ފޯމު ހުށަހެޅުމުގެ ސުންގަޑިއަކީ 2024 ވަނަ އަހަރުގެ ޑިސެންބަރު މަހުގެ 31 ވާ އަންގާރަ ދުވަހުގެ 14:00 އެވެ.
މީގެއިތުރުން، އަންނަ އަހަރުގެ ރަމަޟާން މަހާ ދިމާކޮށް މިބާވަތުގެ އިތުރު ދީނީ މުބާރާތްތައްވެސް ކުރިއަށް ގެންދިއުމަށް އިސްލާމީ ކަންތައްތަކާބެހޭ ވުޒާރާއިން ދަނީ ތައްޔާރުވަމުންނެވެ.
