މަސްވެރިންނާއި އޮޑިދޯނިފަހަރުގެ މަޢުލޫމާތު ބެލެހެއްޓުމަށް އެކުލަވާލެވުނު މަސްވެރިކަމުގެ ދަފުތަރާ ގުޅޭ ގަވާއިދު މިނިސްޓްރީ އޮފް ފިޝަރީޒްއިން މިއަދު ގެޒެޓްކޮށްފިއެވެ.
މި ގަވާއިދުގެ ދަށުން، މަސްވެރިކަމުގެ ދަފުތަރުގައި ރަޖިސްޓަރީ ވުމަށް އެދޭ ފަރާތްތަކުން "ކެޔޮޅު" އެޕްލިކޭޝަން މެދުވެރިކޮށް އެކަމަށް އެދެން ޖެހޭނެއެވެ. އުޅަނދުގެ ވެރިފަރާތް ނުވަތަ އޮޕަރޭޓަރު ރަޖިސްޓަރީ ވުމަށްފަހު، ކެޔޮޅުންނާއި ބިދޭސީން ހިމެނޭގޮތަށް އުޅަނދުގެ ހުރިހާ ފަޅުވެރިންވެސް ދަފުތަރުގައި ރަޖިސްޓަރީ ވާން ޖެހޭނެކަމަށް މިނިސްޓްރީން ވަނީ އަންގާފައެވެ.
މި ގަވާއިދުގެ މައިގަނޑު މަޤްޞަދަކީ މަސްވެރިންނާއި، ފަޅުވެރިންނާއި، އޮޑިވެރިންނާއި އޮޑިދޯނިފަހަރުގެ މަޢުލޫމާތު ހިމެނޭ ދަފުތަރެއް އެކުލަވާލައި، އެ ފަރާތްތަކަށް އިޖުތިމާޢީ ރައްކާތެރިކަން ކަށަވަރުކޮށްދިނުމާއި، އެ ފަރާތްތަކަކީ ދައުލަތް ދަންނަ ބަޔަކަށް ހެދުމެވެ.
ގަވާއިދަށް ޢަމަލުކުރަން ފެށުމަށްފަހު، ފިޝަރީޒް މިނިސްޓްރީން މަސްވެރިންނަށް އަމާޒުކޮށްގެން ދޭ ޚިދުމަތްތައް ލިބޭނީ ހަމައެކަނި ދަފުތަރުގައި ރަޖިސްޓަރީ ވެފައިވާ ފަރާތްތަކަށެވެ. އަދި ދަފުތަރުގައި ރަޖިސްޓަރީ ކުރެވިފައިވާ ފަރާތްތަކަށް މާލީ އަދި އިޖުތިމާޢީ ޚިދުމަތްތައް ފަސޭހަކަމާއެކު ލިބޭނެ އިންތިޒާމު ހަމަޖައްސަން ޖެހޭނެކަމަށް ގަވާއިދުގައި ބަޔާންކޮށްފައިވެއެވެ.
މި ދަފުތަރު އެކުލަވާލުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުތަކުގެ ތެރޭގައި ހިމެނޭ ކަމެއްކަން ފާހަގަކުރެވެއެވެ.
