މަސްތުވާތަކެތީގެ ވިޔަފާރިއަށް ފައިނޭންސްކުރާ އަދި އެ ވިޔަފާރީގައި އުޅޭ ފަރާތްތަކަށް ހަރުކަށި އަދަބުތަކެއް ކަނޑައެޅުމަށް ސަރުކާރުން ހުށަހަޅުއްވާފައިވާ މަސްތުވާތަކެއްޗާބެހޭ ޤާނޫނަށް އިޞްލާޙު ގެނައުމުގެ ބިލަށް އާންމުންގެ ޚިޔާލު ހޯދުމަށް ވަނީ ހުޅުވާލައިފައެވެ.
ގަމު ދާއިރާގެ ޕީއެންސީ މެންބަރު ޔޫސުފް ނަޝީދު ހުށަހެޅުއްވި މި ބިލުގެ އިބްތިދާއީ ބަހުސް ނިންމުމަށްފަހު، ދިރާސާކުރުމަށް މަޖިލީހުގެ ޖުޑީޝަރީ ކޮމިޓީއަށް ފޮނުވާފައިވެއެވެ. އާންމުންގެ ޚިޔާލު ހުށަހެޅުމުގެ މުއްދަތު ހަމަވާނީ މި މަހުގެ 31 ވަނަ ދުވަހުގެ މެންދުރު 12:00 ގައެވެ. ޚިޔާލު ހުށަހެޅުމަށް ހަމަޖެހިފައިވަނީ ޖުޑީޝަރީ ކޮމިޓީގެ އީމެއިލް މެދުވެރިކޮށް ނުވަތަ ރައްޔިތުންގެ މަޖިލީހުގެ އިދާރާއަށް ލިޔުމުންނެވެ.
މި ބިލުގެ މައިގަނޑު މަޤްޞަދަކީ ރާއްޖޭގައި އިތުރުވަމުންދާ މަސްތުވާތަކެތީގެ ވިޔަފާރިއާއި ޓްރެފިކިންގ ހުއްޓުވުމެވެ. އަދި މީގެ އިތުރުން، ޤާނޫނު ތަންފީޒުކުރާ ފަރާތްތަކުގެ ބާރުތައް އިތުރުކުރުމާއި، މަސްތުވާތަކެއްޗަށް ދެވިހިފާފައިވާ މީހުންނަށް ހަރުދަނާ ފަރުވާއެއް ދިނުމަށްފަހު މުޖުތަމަޢަށް އަނބުރާ ރުޖޫޢަވުމުގެ ފުރުސަތު ފަހިކޮށްދިނުން ހިމެނެއެވެ.
އިޞްލާޙުގައި މަސްތުވާތަކެތީގެ ޤާނޫނުގެ 128 ވަނަ މާއްދާއަށް އިތުރުކުރާ ބައިތަކުގައި، މަސްތުވާތަކެތީގެ ޚިދުމަތްދޭ ތަނެއް ދޫކުރުމަކީ ކުށެއްގެ ގޮތުގައި ކަނޑައަޅައި، 5 އަހަރުގެ ޖަލު ޙުކުމަކާއި 50,000 އާއި 100,000 ރުފިޔާއާ ދެމެދުގެ ޖޫރިމަނާއެއް ކަނޑައަޅާފައިވެއެވެ. އަދި މަސްތުވާތަކެތި ބޭނުންކުރުމަށް ތަނެއް ހުއްދަކުރުމަށް މަގުފަހިކުރުމަކީ 10 އަހަރުގެ ޖަލު ޙުކުމަކާއި 100,000 އާއި 200,000 ރުފިޔާއާ ދެމެދުގެ ޖޫރިމަނާއެއް ކުރެވޭނެ ކުށެކެވެ.
މީގެއިތުރުން، މަސްތުވާތަކެއްޗަށް ފައިނޭންސްކުރުމަކީ ކުށެއްކަމަށް ކަނޑައަޅައި، 20 އަހަރުގެ ޖަލު ޙުކުމަކާއި 200,000 އާއި 1,000,000 ރުފިޔާއާ ދެމެދުގެ ޖޫރިމަނާއެއް ކުރެވޭނެކަމަށް ބިލުގައި ބަޔާންކޮށްފައިވެއެވެ. އަދި މަސްތުވާތަކެއްޗަށް ދެވިހިފާފައިވާ މީހުންނަށް ދެވޭ ފަރުވާގެ ނިޒާމާއި ޑްރަގް ކޯޓުގެ އުސޫލުތައް އިތުރަށް ހަރުދަނާކުރުމުގެ މާއްދާތައްވެސް ބިލުގައި ހިމެނިފައިވެއެވެ.
