މަސްވެރިންނަށް އެސްޓީއޯ ރޭޓުން ތެޔޮ ވިއްކަން ފަށާ، މިހާތަނަށް ރާއްޖޭގެ ފަސް ސަރަހައްދެއްގައި މި ޚިދުމަތް ފޯރުކޮށްދޭން ފަށައިފިއެވެ.
މި ކަމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދެއްގެ ދަށުން ކުރިއަށްގެންދާ ކަމެކެވެ. މި މަޝްރޫޢުގެ ދަށުން، ރާއްޖޭގެ ކޮންމެ އަތޮޅެއްގެ މަދުވެގެން އެއް ރަށަކުން، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ "ފަހި ހަކަތަ" ޕޯޓަލް މެދުވެރިކޮށް، އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖައްސަމުން ގެންދެއެވެ.
މިހާރު މި ޚިދުމަތް ފޯރުކޮށްދެމުންދާ ސަރަހައްދުތަކުގެ ތެރޭގައި ކ. ހިންމަފުށި، ޅ. ފެލިވަރު، ގއ. ކޫއްޑޫ، އަދި ސ. ހުޅުމީދޫ ހިމެނެއެވެ. އަދި އެސްޓީއޯގެ ފަރާތުން އިތުރަށް ހާމަކުރި ގޮތުގައި، އަންނަ އަހަރުގެ ނިޔަލަށް ރާއްޖޭގެ ހުރިހާ އަތޮޅެއްގައި ފިއުލް ސްޓޯރޭޖް ޤާއިމްކޮށް، އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުމަށް މަސައްކަތް ކުރަމުން ގެންދެއެވެ.
