ކަސްޓަމްސް ސަރވިސްގެ ސައުތު ރީޖަނަލް ހެޑް އޮފީހުގެ އައު އިމާރާތް މިއަދު އައްޑޫ ސިޓީ މަރަދޫގައި ރަސްމީކޮށް ހުޅުވައިފިއެވެ. އިމާރާތް ހުޅުވުމުގެ ރަސްމިއްޔާތުގައި ޝަރަފުވެރި މެހެމާނުންގެ ގޮތުގައި ބައިވެރިވެ ވަޑައިގެންނެވީ ކަސްޓަމްސްއާ ހަވާލުވެ ހުންނެވި ހޯމްލޭންޑް ސެކިއުރިޓީ މިނިސްޓަރު އަލީ އިހްސާން އާއި ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާއެވެ.
މިނިސްޓަރު އިހްސާން ވިދާޅުވި ގޮތުގައި އައްޑޫ ސިޓީގެ ވިޔަފާރި އާއި އެކްސްޕޯޓް އިމްޕޯޓްގެ މަސައްކަތްތައް އިތުރުވަމުންދާ ދަނޑިވަޅެއްގައި މި އޮފީސް ހުޅުވުމަކީ ވަރަށް މުހިންމު ކަމެކެވެ. އަދި މީގެ ސަބަބުން އައްޑޫ ސިޓީގެ ވިޔަފާރި ބަނދަރުތައް ބެލެހެއްޓުން އިތުރަށް ހަރުދަނާ ވެގެންދާނެ ކަމަށް ވިދާޅުވިއެވެ.
ކޮމިޝަނަރ ޖެނެރަލް ދިޔާނާ ފާހަގަކުރެއްވި ގޮތުގައި މި އައު އޮފީހުގެ ސަބަބުން ކަސްޓަމްސްގެ ޚިދުމަތްތައް އިތުރަށް ހަރުދަނާވެ، އަވަސްވެގެންދާނެއެވެ. މި އިމާރާތުގައި އައްޑޫގެ އެކި ބަނދަރުތަކަށް ގެނެވޭ މުދަލުގެ ލިޔެކިޔުން ނިންމުމުގެ މަސައްކަތްތަކާއި، މުވައްޒަފުންގެ ތަމްރީން ޕްރޮގްރާމްތައް ކުރިއަށް ގެންދިއުމަށް ޚާއްސަ ވަސީލަތްތައް ހިމެނިފައިވާ ކަމަށް އޭނާ ވިދާޅުވިއެވެ.
ތިން ބުރީގެ މި އިމާރާތުގައި އިދާރީ އޮފީސް، ސްޓާފް އެކަމަޑޭޝަން އަދި ރީޖަނަލް ޓްރޭނިންގ ސެންޓަރެއް ގާއިމުކޮށްފައިވެއެވެ. 2021 ވަނަ އަހަރު އެސްޖޭ ޓްރޭޑް ޕްރައިވެޓް ލިމިޓެޑާ ހަވާލުކޮށްގެން ފެށުނު މި އިމާރާތުގެ މަސައްކަތަށް ދައުލަތުގެ ބަޖެޓުން 22.3 މިލިއަން ރުފިޔާ ހޭދަކުރެވިފައިވެއެވެ.
