ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް، ކުރީގެ ރައީސް މުހައްމަދު އަމީނަށް ހެދި ގޮތަށް ހަދަންޖެހޭނެ ކަމަށް ބުނެ ޓެރަރިޒަމްގެ އަމަލެއް ކުރުމަށް އިދިކޮޅު އެމްޑީޕީން ހިތްވަރުދިން ކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފިއެވެ.
މިމައްސަލަ ހުށަހެޅުއްވީ މަޖިލީހުގެ މިލަންދޫ ދާއިރާގެ ޕީއެންސީ މެންބަރު ހަސަން މުފީދު އަބްދުލްގާދިރު އެވެ.
މިމައްސަލާގައި ގޮވާލާފައިވަނީ އެމްޑީޕީން އެކިއެކި ޕޯޑިއަމްތަކުގައި ދައްކާފައިވާ މި ވާހަކަތައް ތަހުގީގު ކުރުމަށެވެ. އަދި އެއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް، ކުރީގެ ރައީސް މުހައްމަދު އަމީނަށް ހެދި ގޮތަށް ހަދަންޖެހޭނެ ކަމަށް ބުނެ ޓެރަރިޒަމްގެ އަމަލެއް ކުރުމަށް ހިތްވަރުދިން ކަމަށް ބެލެވޭ ވާހަކަތަކެއްކަމަށްވެސް ކުއްލި މައްސަލާގައި ބުނެފައި ވެއެވެ. މި މައްސަލައަށް މަޖިލީހުގައި ބަހުސްކުރުމަށް ނެގުނު ވޯޓުގައި 44 މެންބަރުން ވޯޓު ދެއްވީ ފެންނަ ކަމަށެވެ. އަދި އަށް މެންބަރުން ވޯޓު ދެއްވީ ނުފެންނަ ކަމަށެވެ. މީގެ އިތުރުން އެއް މެންބަރަކު ވަކި ގޮތަކަށް ވޯޓު ދޭން ބޭނުންނުވާ ކަމަށް ވޯޓު ދެއްވި އެވެ.
