ޑރ. ފަރަހަނާޒް ފައިސަލް، ރާއްޖޭގެ ފުރަތަމަ ރައީސް މުހައްމަދު އަމީން ދީދީގެ ކާފަ ދަރިކަނބަލުން، އެމްޑީޕީގެ ޗެއާޕާސަން ފައްޔާޒް އިސްމާއިލްގެ ފަހުގެ ބަޔާނަކާ މެދު ވަރަށް ބޮޑު ކަންބޮޑުވުން ފާޅުކުރައްވައިފިއެވެ.
މި މައްސަލަ ފެށުނީ އެމްޑީޕީން ކުޅުދުއްފުށީގައި ބޭއްވި ޖަލްސާއެއްގައި، މީހަކު ރައީސް ޑރ މުހައްމަދު މުއިއްޒުއާ މެދު އަމީން ދީދީއަށް ރައްޔިތުން ހެދިގޮތަށް ހަދަން ޖެހިދާނެ ކަމަށް ބުނުމުންނެވެ. މިކަމާ ގުޅިގެން ފައްޔާޒް އިސްމާއިލް ވިދާޅުވީ އެ މީހާގެ ބަސްތައް ނަސޭހަތެއްގެ ގޮތުގައި ދެކެވަޑައިގަންނަވާ ކަމަށެވެ. އަދި ކުރީގެ އިކޮނޮމިކް މިނިސްޓަރު އިތުރަށް ވިދާޅުވީ ވެރިންނަށް ތާރީޚުގެ ހާދިސާތައް ހަނދާންކޮށްދިނުމަކީ މުހިންމު ކަމެއް ކަމަށެވެ.
ނަމަވެސް، ފަރަހަނާޒް ފައިސަލް އެކްސް މެދުވެރިކޮށް ވިދާޅުވެފައިވަނީ އިސްލާމީ ޝަރުޢީ ހަމަތަކުން ބޭރުން މީހަކު މަރާލުމަކީ ޤަބޫލުކުރެވޭނެ ކަމެއް ނޫން ކަމަށެވެ. އަދި މިއީ އިންސާނީ އަސާސީ ޙައްޤުތަކަށް ތެދުވި އެމްޑީޕީގެ އަސްލު ސިފައާ ޚިލާފު ކަމެއްގެ ގޮތުގައި ފާހަގަކުރައްވާފައިވެއެވެ.
މިއީ އެމްޑީޕީގެ ރަސްމީ ސްޓޭންޑް ތޯޯޯ؟ އެހެންނަމަ މިއީ ދިރިހުރުމުގެ ހައްގު ހިމެނޭ ގޮތަށް މީހުންގެ އަސާސީ ހައްގުތަކަށް ތެދުވި އެމްޑީޕީއެއް ނޫން.
ނިމިގެން ދިޔަ ރައީސް ސާލިހުގެ ވެރިކަމުގައި ރާއްޖެއިން އިނގިރޭސިވިލާތަށް ކަނޑައަޅުއްވާފައި ހުންނެވި ސަފީރުގެ މަގާމުވެސް ފުރުއްވި ފަރަަހަނާޒް އެކްސްގައި ވިދާޅުވި އެވެ.
ތާރީޚީ ގޮތުން ބަލާއިރު، އަމީން ދީދީ ބޭސްފަރުވާއަށް ކޮލަމްބޯގައި ހުންނެވިއިރު، ސަރުކާރުގެ އިސް ފަރާތްތަކުން ބަޣާވާތްކޮށް، އިބްރާހީމް ނާސިރު ވެރިކަމަށް ގެނައެވެ. އަމީން ދީދީ ރާއްޖެ ވަޑައިގަތުމުން، އެމަނިކުފާނު ދޫނިދޫގައި ބަންދުކުރެވުނެވެ. މިކަމާ ގުޅިގެން ހިނގި ހަމަނުޖެހުންތަކުގައި އަމީން ދީދީއަށް އަނިޔާކުރެވި، ފަހުން ކ. ގާފަރަށް އަރުވާލެވުނެވެ. އެމަނިކުފާނުގެ ސިއްޙީ ޙާލަތު ގޯސްވުމާ ގުޅިގެން ކ. ވިހަމަނާފުއްޓަށް ގެންދެވުނު ފަހުން އަވަހާރަވިއެވެ.
