ނެޝަނަލް އިންޓެގްރިޓީ ކޮމިޝަން (އެންއައިސީ) ގެ މެމްބަރު ކަމުގެ މަގާމަށް ގ. ނޫރަންފިނި، މަރްޔަމް އިންޝާ ފައިސަލްގެ ނަން ރައްޔިތުންގެ މަޖިލިހުން މިއަދު ފާސްކޮށްފިއެވެ.
މަޖިލިހުގައި މިއަދު ނެގި ވޯޓުގައި އިންޝާ އެ މަގާމަށް އައްޔަން ކުރަން ފާސްވީ 58 މެމްބަރުންގެ އަޣުލަބިއްޔަތުންނެވެ.
އެންއައިސީގެ މެންބަރަކަށް އިންޝާގެ ނަން، ރައީސް ޑރ. މުހައްމަދު މުއިއްޒު ފޮނުއްވެވީ މިދިޔަ ނޮވެމްބަރު މަހުގެ 23 ވަނަ ދުވަހުގައެވެ. ރައީސް އޮފީހުން މައުލޫމާތު ދެއްވާފައިވާ ގޮތުގައި އިންޝާގެ ނަން ހުށަހެޅިފައިވަނީ އެ މަގާމަށް މީހަކު ހޯދުމަށް ކުރެވުނު އިއުލާނާ ގުޅިގެން ކުރިމަތިލެއްވި ފަރާތްތަކުގެ ތެރެއިންނެވެ.
2015 ވަނަ އަހަރު އުފެއްދުނު ނެޝަނަލް އިންޓެގްރިޓީ ކޮމިޝަނަކީ މޯލްޑިވްސް ކަސްޓަމްސް ސަރވިސް، މޯލްޑިވްސް ޕޮލިސް ސަރވިސް، މޯލްޑިވްސް ކަރެކްޝަނަލް ސަރވިސް އަދި މޯލްޑިވްސް އިމިގްރޭޝަންގެ މުވައްޒަފުން ކުރާ ގާނޫނާއި ގަވާއިދާ ޚިލާފު އަމަލުތައް ބަލައި ތަހުގީގުކުރުމުގެ މަސްއޫލިއްޔަތު މަތިކުރެވިފައިވާ މިނިވަން މުއައްސަސާއެކެވެ.
