މަތީ ސާނަވީ ފެންވަރުގައި އިސްލާމް މާއްދާ ކިޔަވައިދެއްވާ މުދައްރިސުން އިސްލާމިކް ފައިނޭންސަށް އަހުލުވެރިކުރުވުމަށް ޚާއްސަ ޕްރޮގްރާމެއް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފަށައިފިއެވެ.
"ޕްރެކްޓިކަލް އިންސައިޓްސް: އިސްލާމިކް ފައިނޭންސް ފޯ އެޑިއުކޭޓަރސް" ގެ ނަމުގައި ކުރިއަށްގެންދިޔަ މި ޕްރޮގްރާމަކީ އެމްއެމްއޭ އާއި، އެޑިޔުކޭޝަން މިނިސްޓްރީ އަދި ރާއްޖޭގެ މާލީ މުއައްސަސާތައް ގުޅިގެން މާލެ ސަރަހައްދުގެ ސްކޫލުތަކުގައި މަތީ ސާނަވީއަށް އިސްލާމް މާއްދާ ކިޔަވައިދެއްވާ މުދައްރިސުންނަށް އަމާޒުކޮށްގެން ހިންގި ޕްރޮގްރާމެކެވެ.
މި ޕްރޮގްރާމުގެ މައިގަނޑު މަޤްޞަދަކީ ރާއްޖޭގައި އިސްލާމިކް ފައިނޭންސިންގ ޚިދުމަތް ފޯރުކޮށްދޭ މުއައްސަސާތަކުން ދެމުންދާ ޚިދުމަތްތަކާއި، އެ ޚިދުމަތްތައް ފޯރުކޮށްދިނުމުގައި ޢަމަލުކުރާ އުސޫލުތަކާ ބެހޭ މަޢުލޫމާތު މުދައްރިސުންނާ ހިއްސާކޮށް، އެ މުދައްރިސުންގެ ފަރާތުން ދަރިވަރުންނަށް ރާއްޖޭގެ އިސްލާމިކް ފައިނޭންސާ ބެހޭ އެންމެ ފަހުގެ ސައްހަ މަޢުލޫމާތު ފޯރުކޮށްދިނުމެވެ.
މި ޕްރޮގްރާމުގައި ވާހަކަފުޅު ދައްކަވަމުން އެމްއެމްއޭގެ ގަވަރުނަރު އަޙްމަދު މުނައްވަރު ވިދާޅުވީ، ރާއްޖޭގައި އިސްލާމިކް ފައިނޭންސިންގ ކުރިއެރުވުމަށް ވަރަށް ބޮޑު އަހައްމިއްޔަތުކަމެއް ދެއްވާ ކަމަށާއި، މިހާރު އެންމެ އިސްކަމެއް ދޭންވީ އިސްލާމިކް ފައިނޭންސަށް ހޭލުންތެރިކަން އިތުރުކުރުމަށް ކަމަށެވެ. އަދި ސްކޫލް ނިންމާ ދަރިވަރުންނަށް މި މަޢުލޫމާތު އެނގުމަކީ ވަރަށް މުހިންމު ކަމެއްކަމުގައި ގަވަރުނަރު ފާހަގަކުރެއްވިއެވެ.
މި ޕްރޮގްރާމުގައި އިސްލާމިކް ބޭންކިންގ އާއި އާންމު ބޭންކިންގ އަދި އިންޝުއަރެންސް އާއި ތަކާފުލްގެ ތަފާތުތައް ކިޔައިދެވި، ރާއްޖޭގައި މި ޚިދުމަތްތައް ފޯރުކޮށްދެމުންދާ ގޮތްތައް މުދައްރިސުންނަށް އޮޅުންފިލުވައިދެވުނެވެ.
