ރައީސް ޑރ. މުހައްމަދު މުއިއްޒު މިއަދު އއ. ރަސްދޫގައި އެރަށުގެ ގެސްޓްހައުސް ވެރިންނާ ބައްދަލުކުރައްވާއިފިއެވެ. ރަސްދޫ އަތޮޅު ގޭގައި ބޭއްވުނު މި ބައްދަލުކުރެއްވުމުގައި، ގެސްޓްހައުސް ވެރިން ވަނީ އެރަށާ ކައިރީގައިވާ ފިނޮޅު ގިރަމުންދާ މައްސަލައާމެދު ކަންބޮޑުވުން ފާޅުކުރައްވާފައެވެ. އަދި އެ ސަރަހައްދު އިތުރަށް ގިރުމުގެ ކުރިން ތިމާވެއްޓަށް ގެއްލުން ނުވާނެހެން އީއައިއޭ ހަދައިގެން ހިމާޔަތްކޮށްދެއްވުމަށް އެދިވަޑައިގެންނެވިއެވެ.
ބައްދަލުކުރެއްވުމުގައި އިތުރު ކަންބޮޑުވުންތަކެއްގެ ގޮތުގައި ރަށުގެ ގެސްޓްހައުސް ވިޔަފާރި ފުޅާކުރުމަށް ދިމާވެފައިވާ ގޮންޖެހުންތަކާއި، ރަށުގެ އިޤްތިޞާދު ދެމެހެއްޓެނިވި ގޮތެއްގައި ކުރިއެރުވުމަށް ބޭނުންވާ ކަންކަން ފާހަގަކުރެއްވިއެވެ. ވިޔަފާރިއަށް މުހިންމު އެއް ޚިދުމަތެއްގެ ގޮތުގައި ރަށުގައި ޑޮލަރު އޭޓީއެމްގެ ޚިދުމަތް ޤާއިމުކުރުމުގެ މުހިންމުކަންވެސް އެފަރާތްތަކުން ފާހަގަކުރެއްވިއެވެ.
މި ކަންބޮޑުވުންތަކަށް ޖަވާބު ދެއްވަމުން ރައީސް މުއިއްޒު ވިދާޅުވީ، ގެސްޓްހައުސް ވެރިން ފާހަގަކުރެއްވި ހުރިހާ ކަމެއް ކަމާބެހޭ އިދާރާތަކާ މަޝްވަރާކުރެއްވުމަށްފަހު ވަކިވަކިން ބައްލަވާނެ ކަމަށެވެ. އަދި ހާއްސަކޮށް ފިނޮޅު ގިރުމުގެ މައްސަލައަށް ތިމާވެއްޓަށް ރައްޓެހި ހައްލެއް ހޯދުމަށް މަސައްކަތް ކުރައްވާނެކަމުގެ ޔަގީންކަންވެސް އެމަނިކުފާނު ދެއްވިއެވެ.
