އިމިގްރޭޝަނުން އާންމުކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި މިއަދުގެ ނިޔަލަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ 1.88 މިލިއަނަށް އަރައިފިއެވެ. މިއީ މިދިޔަ އަހަރު ރާއްޖެއަށް ޒިޔާރަތްކުރި 1.87 މިލިއަން ފަތުރުވެރިންނަށްވުރެ އިތުރު އަދަދެކެވެ. އަދި މިއީ ރާއްޖެއަށް ފަތުރުވެރި ޒިޔާރަތްކުރުމުގެ މުޅިން އާ ރެކޯޑެކެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި އިއްޔެގެ ނިޔަލަށް މިއަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ މިދިޔަ އަހަރާ އަޅާބަލާއިރު 8.7 ޕަސެންޓް އިތުރުވެފައެވެ. މިއަހަރު އެންމެ ގިނަ ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ޗައިނާ (254،354)، ރަޝިއާ (208،946)، އިނގިރޭސިވިލާތް (164،183)، ޖަރުމަނުވިލާތް (145،596) އަދި އިޓަލީވިލާތް (127،076) ހިމެނެއެވެ. މިދިޔަ އަހަރު އެންމެ ގިނަ ފަތުރުވެރިން ޒިޔާރަތްކުރި އިންޑިއާ މިއަހަރު ވަނީ 6 ވަނަ ހިސާބަށް ދަށަށް ގޮސްފައެވެ.
ފަތުރުވެރިކަމުގެ މި އާ ރެކޯޑާ ގުޅިގެން ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވި ގޮތުގައި މިއީ ފަޚުރުވެރިވާންޖެހޭ ކަމެކެވެ. އަދި މިއަހަރަށް ކަނޑައަޅާފައިވާ 2 މިލިއަން ފަތުރުވެރިންގެ އަމާޒަށް ވާސިލުވުމަށް މަސައްކަތްކުރުން ކުރިއަށް ގެންދަވާނެ ކަމުގައިވެސް އެމަނިކުފާނު ވިދާޅުވިއެވެ.
