ހެލްތް މިނިސްޓްރީން މިއަދު ވަނީ ދުންފަތުން ދުރުވާން ބޭނުންވާ ފަރާތްތަކަށް އެހީތެރިވުމަށް ޚާއްޞަ ހިދުމަތް ތަޢާރަފުކޮށްފައެވެ. "ކުއިޓް ލައިން" ގެ ނަމުގައި ތަޢާރަފުކުރެވުނު މި ހިދުމަތް ލިބިގަނެވޭނީ 1671 ނަންބަރު މެދުވެރިކޮށް ކަމަށްވާއިރު، މި ހިދުމަތް ފޯރުކޮށްދެނީ އެޗްޕީއޭ މެދުވެރިކޮށެވެ.
ހިދުމަތް ތަޢާރަފުކުރުމުގެ ރަސްމިއްޔާތުގައި ހެލްތް މިނިސްޓަރު ނާޒިމް ވިދާޅުވި ގޮތުގައި، ދުންފަތުން ދުރުވާން ބޭނުންވާ ފަރާތްތަކަށް ބޭނުންވާ ތަކެތި އާސަންދަ މެދުވެރިކޮށް ފޯރުކޮށްދިނުމުގެ މަސައްކަތް މިހާރު ދަނީ ކުރެވެމުންނެވެ. މީގެ ތެރޭގައި ނިކޮޓިން ޕެޗް، ގަމް އަދި އެހެނިހެން ފަރުވާގެ ބާވަތްތައް އާސަންދައިން ކަވަރުކޮށްދިނުމަށް ސަރުކާރުން ވަނީ ނިންމާފައެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ވަނީ ރާއްޖޭގެ ހުރިހާ ސިޓީތަކާއި ރަށްތަކުގައި "ޓޮބޭކޯ ސިޒޭޝަން ކްލިނިކް" ގާއިމުކުރުމަށް ނިންމަވާފައެވެ. މީގެ އިތުރުން، ދުންފަތުގެ އިސްތިއުމާލު ހުއްޓާލަން ބޭނުންވާ ފަރާތްތަކަށް ބޭނުންވާ ބޭސްތައް އެސްޓީއޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލްތަކުން ލިބޭނެ އިންތިޒާމު ހަމަޖެއްސުމަށްވެސް ވަނީ ނިންމާފައެވެ.
ދުންފަތުގެ ބޭނުންކުރުން ހުއްޓުވުމަށް އެޅޭ އިތުރު ފިޔަވަޅެއްގެ ގޮތުން، ރައީސް މުއިއްޒު ވަނީ 15 ނޮވެމްބަރުން ފެށިގެން ވޭޕްކުރުމަށް ބޭނުންކުރާ ތަކެތި ރާއްޖެއަށް އެތެރެކުރުން މަނާކުރައްވާފައެވެ. އަދި ދުންފަތުގެ އުފެއްދުންތަކުގެ ވިޔަފާރީގެ މުޢާމަލާތްތައް ކުރެވޭނެ އެންމެ ހަގު އުމުރު 21 އަހަރަށް ބަދަލުކުރުމަށް ޤާނޫނަށް އިސްލާހު ގެނައުމަށްވެސް ވަނީ ނިންމަވާފައެވެ.
