އެންޓި-ކޮރަޕްޝަން ކޮމިޝަން (އޭސީސީ)ގެ މަސައްކަތްތައް ހަރުދަނާކުރުމާ ގުޅޭ އެއްބަސްވުމެއްގައި ދިވެހި ސަރުކާރާއި ޖަޕާނު ސަރުކާރާ ދެމެދު މިއަދު ސޮއިކޮށްފިއެވެ.
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފޮރިން މިނިސްޓަރު ޑރ. ޢަބްދުﷲ ހަލީލް ކަމަށްވާއިރު، ޖަޕާނު ސަރުކާރުގެ ފަރާތުން ސޮއިކުރެއްވީ ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރިއެވެ.
ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ކުރިއަށް ގެންދެވޭ މި މަޝްރޫޢަށް، ޖަޕާނު ސަރުކާރުން ހިލޭ އެހީގެ ގޮތުގައި 300 މިލިއަން ޖަޕާނީސް ޔެން (2.2 މިލިއަން ޑޮލަރު) ދެއްވުމަށް ނިންމަވާފައިވާކަމަށް ފޮރިން މިނިސްޓްރީން މަޢުލޫމާތު ދެއްވިއެވެ. މި އެހީ ދިނުމަށްޓަކައި "އެކްސްޗޭންޖް އޮފް ނޯޓްސް"ގައި ސޮއިކުރެވުނު ރަސްމިއްޔާތުގައި އޭސީސީގެ ރައީސް އާދަމް ޝާމިލްގެ އިތުރުން ފޮރިން މިނިސްޓްރީ، އޭސީސީ، ފިނޭންސް މިނިސްޓްރީ އަދި ޖަޕާނު އެމްބަސީގެ އިސްވެރިން ބައިވެރިވެވަޑައިގެންނެވިއެވެ.
މިނިސްޓަރު ހަލީލް ވިދާޅުވި ގޮތުގައި، މި މަޝްރޫޢަކީ ރާއްޖޭގައި ކޮރަޕްޝަނާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާކުރުމަށް ލިބިގެންދާނެ މުހިންމު ކުރިއެރުމެކެވެ. އަދި މިއީ ހާމަކަން ބޮޑު، ދެފުށް ފެންނަ އަދި ޒިންމާދާރު ސަރުކާރެއް ބިނާކުރުމަށް އެޅޭ މުހިންމު ފިޔަވަޅެއް ކަމުގައިވެސް އެމަނިކުފާނު ފާހަގަކުރެއްވިއެވެ.
