ޖަމާލުއްދީން ސްކޫލްގެ ދަރިވަރެއް ކަމުގައިވާ ހުސައިން ނާއިޝްގެ އިސްލާމިކް ކެލިގްރަފީގެ ހުނަރު ތަރައްގީ ކުރުމަށް އެހީތެރިވެދޭން އިސްލާމިކް މިނިސްޓްރީން ނިންމާއިފިއެވެ. ވާހަކަ ދެއްކުމާއި އަޑުއިވުމުގެ ނުކުޅެދުންތެރިކަން ހުރި ނަމަވެސް، ނާއިޝް ވަނީ ކީރިތި ގުރުއާން ލިޔުމާއި އިސްލާމިކް ކެލިގްރަފީގެ ދާއިރާއިން ފާހަގަކޮށްލެވޭ ހުނަރެއް ދައްކުވައިދީފައެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ނާއިޝްގެ މި ހުނަރު ފާހަގަކުރައްވައި، އޭނާއާ ބައްދަލުކުރައްވައި، މިނިސްޓްރީން އެހީތެރިވެދޭން ނިންމި ގޮތްތަކުގެ މަޢުލޫމާތު ސޯޝަލް މީޑިއާގައި ހިއްސާކުރައްވާފައެވެ. މިގޮތުން، ނާއިޝްއަށް ކެލިގްރަފީ ދާއިރާއިން އިތުރު ތަމްރީނު ދިނުމާއި، ސްކޫލް ނިންމުމަށްފަހު ޤުރުއާން މަރުކަޒުގައި އެހެން ކުދިންނަށް މި ހުނަރު ދަސްކޮށްދިނުމުގެ ފުރުސަތު ދިނުމަށް ވަނީ ނިންމާފައެވެ.
އަދި އަންނަ އަހަރު ހުޅުވުމަށް ހަމަޖެހިފައިވާ އައްޑޫ ހިތަދޫ އިސްލާމީ މަރުކަޒާއި، ދިއްދޫ އިސްލާމީ މަރުކަޒު، އަދި ފުވައްމުލަކު ޤުރުއާން މަރުކަޒުގައި ނާއިޝްގެ ކެލިގްރަފީ މަސައްކަތްތައް ބެހެއްޓުމުގެ ފުރުސަތުވެސް ދެވޭނެއެވެ. މިނިސްޓަރު ޝަހީމް ވިދާޅުވި ގޮތުގައި، އިސްލާމިކް ކެލިގްރަފީ ތައްޔާރުކުރުމަށް ބޭނުންވާ ޒަމާނީ ވަސީލަތްތައް ނާއިޝްއަށް ފޯރުކޮށްދީ، އެ ދާއިރާގެ ފަންނުވެރިއެއްގެ އިރުޝާދުގެ ދަށުން އިތުރު ތަމްރީނު ދެވޭނެއެވެ.
ށ. ކަނޑިތީމަށް އުފަން ނާއިޝްގެ ހުނަރު އެންމެ ފުރަތަމަ ފާހަގަކުރެވުނީ 2022 ވަނަ އަހަރު ބޭއްވުނު "ރިވެލި" މައުރަޒުގައެވެ. މިނިސްޓަރު ޝަހީމް ވަނީ އިސްލާމީ ދާއިރާތަކުން ކުރިއަށް ދިއުމަށް ޝައުޤުވެރިކަން ހުރި އެހެން ހުރިހާ ކުދިންނަށްވެސް މިފަދަ ފުރުސަތުތައް މިނިސްޓްރީން ފަހިކޮށްދެމުން ގެންދާނެކަމުގެ ޔަގީންކަން ދެއްވާފައެވެ.
