އއ. އަތޮޅު ކައުންސިލާ ބައްދަލުކުރެއްވުމަށް ކުރެއްވި ދަތުރުފުޅުގައި، ރައީސް ޑރ. މުހައްމަދު މުއިއްޒު ވަނީ އެ އަތޮޅުގެ ތަރައްގީއަށް އެއާޕޯޓެއް އަޅުއްވައިދެއްވާނެކަމުގެ ޔަގީންކަން ދެއްވާފައެވެ. މިއަދު އއ. ރަސްދޫގައި ބޭއްވުނު މި ބައްދަލުކުރެއްވުމުގައި، ރައީސް މުއިއްޒު ވިދާޅުވީ އެއާޕޯޓަކީ އެ އަތޮޅުގެ ތަރައްގީއަށް ކޮންމެހެން ބޭނުންވާ މުހިންމު މަޝްރޫއެއްކަމަށެވެ. ނަމަވެސް މި މަޝްރޫއު ކުރިއަށް ގެންދަވާނެ ގޮތުގެ އިތުރު ތަފްސީލެއް ރައީސް ހާމަކުރައްވާފައެއް ނުވެއެވެ.
މިހާރު ރާއްޖޭގައި އެއާޕޯޓެއްގެ އެއްވެސް މަސައްކަތެއް ކުރިއަށް ނުދާ ދެ އަތޮޅުގެ ތެރެއިން އެއް އަތޮޅަކީ އއ. އަތޮޅެވެ. އަނެއް އަތޮޅަކީ ވ. އަތޮޅެވެ. މި ބައްދަލުކުރެއްވުމުގައި އަތޮޅުގެ ތަރައްގީއާ ގުޅޭ ގިނަ ކަންކަމާ މެދު މަޝްވަރާކުރެވުނެވެ. އަތޮޅު ކައުންސިލަރުން ވަނީ އެ އަތޮޅުން ޕާސްޕޯޓާއި އައިޑީ ކާޑުގެ ޚިދުމަތް ލިބޭނެ އިންތިޒާމު ހަމަޖައްސަވައިދެއްވުމަށް އެދިވަޑައިގެންފައެވެ.
މީގެ އިތުރުން، އަތޮޅުގެ ރައްޔިތުންނަށް އާމްދަނީ ހޯދުމަށް ފަޅުގެ ބޭނުން ކުރެވޭނެ ގޮތް ހަމަޖައްސަވައިދެއްވުމަށާއި، އާމްދަނީ ހޯދޭނެ އެހެނިހެން މަގުތައް ތަނަވަސްކޮށްދެއްވުމަށްވެސް އެދިވަޑައިގެންނެވިއެވެ. އަދި ލާމަރުކަޒީ ނިޒާމު އިތުރަށް ހަރުދަނާކުރުމަށް ކުރެވިދާނެ ކަންކަމާ ބެހޭގޮތުންވެސް މަޝްވަރާކުރެވުނެވެ.
