ދިގު މުއްދަތެއްގެ ވެރިކަމަށްފަހު ރައީސް ބަޝާރު އަލް-އަސަދުގެ ވެރިކަން ވެއްޓި، އެ ގައުމުގެ ވެރިރަށް ދަމާސްކަސް މިހާރު ވަނީ އިދިކޮޅު ހަނގުރާމަވެރިންގެ ބާރުގެ ދަށަށް ހިގައްޖެއެވެ. މިކަން މިހެން ވުމާއެކު، ގައުމުގެ ސަރުކާރުގެ އިދާރާތައް ކުރީގެ ބޮޑުވަޒީރުގެ ބެއްލެވުމުގެ ދަށުން ހިންގަމުން ގެންދާނެ ކަމަށް އަދި މި އިދާރާތައް ރަސްމީކޮށް އައު ވެރިކަމާ ހަވާލުކުރެވެންދެން މިގޮތަށް ކުރިއަށްދާނެ ކަމަށް ހަނގުރާމަވެރިން ބުނެފައިވެއެވެ.
ރިޕޯޓުތައް ބުނާ ގޮތުގައި ރައީސް އަސަދް ވަނީ މަތިންދާބޯޓަކުން ދަމާސްކަހުން ފުރައިގެން ވަޑައިގެންފައެވެ. ނަމަވެސް އެމަނިކުފާނު ދަތުރުކުރައްވާފައިވާ މަންޒިލެއް އަދި އެނގިފައެއް ނުވެއެވެ. އަދި ސީރިއާގެ ބޮޑުވަޒީރު މުޙައްމަދު ގާޒީ އަލް-ޖަލާލީ ވިދާޅުވެފައިވަނީ އަސަދް މިވަގުތު ހުންނެވި ތަނެއް އެނގިވަޑައިނުގަންނަވާ ކަމަށެވެ.
މީގެއިތުރުން، އިޖުތިމާއީ މީޑިއާގައި ޙިއްސާކުރެވެމުންދާ އަދި ސައްޙަކަން ކަށަވަރު ނުކުރެވޭ މަންޒަރުތަކުން ދައްކާ ގޮތުގައި، ސައިދްނާޔާ ޖަލުން އެތައްހާސް ކުށްވެރިންނަށްވަނީ މިނިވަން ވެފައެވެ. މި ޖަލަކީ ރައީސް އަސަދްގެ އިދިކޮޅު ފަރާތްތަކަށް އެތައް އަނިޔާއެއް ކުރެވި، އެތައް ބަޔަކު މަރާލެވިފައިވާ ޖަލެކެވެ.
