ޗާގޯސްގެ ރަށްތައް މޮރިޝަސްއަށް ދިނުމާ ގުޅިގެން ރައީސް ޑރ. މުޙައްމަދު މުއިއްޒު އިނގިރޭސި ސަރުކާރަށް ފޮނުއްވި ސިޓީފުޅު ހާމަނުކުރެވޭނެ ކަމަށް ސަރުކާރުން ބުނެފިއެވެ. މި ސިޓީފުޅު ފޮނުއްވި ކަމުގެ މައުލޫމާތު ރައީސް އަމިއްލަފުޅަށް ހާމަކުރެއްވީ ނޮވެމްބަރު 10 ވަނަ ދުވަހު ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައެވެ.
ރައީސްގެ ސިޓީގައި ފާހަގަކުރައްވާފައިވަނީ ގޮތުގައި، ޗާގޯސްއަކީ ލިޔެކިޔުންތަކުން ފެންނަ ގޮތުގައި ރާއްޖެއާ ގުޅުން އޮތް ސަރަހައްދެއް ކަމަށްވާތީ، އެ ސަރަހައްދު އެހެން ޤައުމަކަށް ލިބުމަށްވުރެ ދިވެހިރާއްޖެއަށް ލިބުން މުހިންމު ކަމުގައި ދެކެވަޑައިގަންނަވާ ކަމަށެވެ.
އިނގިރޭސި ސަރުކާރުން ޗާގޯސް މޮރިޝަސްއާ ހަވާލުކުރުމުގެ ވާހަކަތައް ދެކެވެން ފެށުމާ ގުޅިގެން، ދިވެހި ސަރުކާރުން ވަނީ އިނގިރޭސި ސަރުކާރަށް ރަސްމީކޮށް ސިޓީއެއް ފޮނުއްވާފައެވެ.
ބައެއް މީޑިއާތަކުން ވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އެ ސިޓީފުޅުގެ ކޮޕީއަކަށާއި، ސިޓީގައި ހިމެނޭ ކަންކަން ހާމަކޮށްދިނުމަށް އެދިފައެވެ. ނަމަވެސް ރައީސް އޮފީހުން ޖަވާބު ދެއްވާފައިވަނީ އެ މައުލޫމާތަކީ އެ ގާނޫނުގެ 31 ވަނަ މާއްދާގެ ދަށުން ދެވެން ނެތް މައުލޫމާތެއް ކަމަށެވެ.
އަދި މި މައްސަލައިގައި ފާހަގަކޮށްލެވޭ އެއް ކަމަކީ، ކުރީގެ ރައީސް އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ކަނޑުގެ މައްސަލައިގައި ފޮނުއްވި ސިޓީފުޅެއް ހާމަނުކުރެއްވި އިރު، އޭރު އިދިކޮޅުގައި ތިއްބެވި މިހާރުގެ ސަރުކާރުގެ ވެރިން އެކަމާމެދު ނުރުހުން ފާޅުކުރެއްވި ކަމެވެ.
