އެންޓި ކޮރަޕްޝަން ކޮމިޝަން (އޭސީސީ)ގެ ހުސްވެފައިވާ މެންބަރުކަމަށް ކުރިމަތިލުމުގެ ފުރުސަތު ހުޅުވާލައިފައެވެ. މިގޮތުން ކުރިމަތިލުމަށް ޝައުގުވެރިވާ ފަރާތްތަކުން މި މަހުގެ 16 ވަނަ ދުވަހުގެ މެންދުރު 12:00ގެ ކުރިން ކަމާގުޅޭ ލިޔެކިޔުންތަކާއެކު ފޯމު ހުށަހެޅުމަށް ރައީސް އޮފީހުން ކުރި އިއުލާނުގައި ބަޔާންކޮށްފައިވެއެވެ.
މި މަޤާމުތައް ހުސްވެފައިވަނީ މިދިޔަ ނޮވެމްބަރު 25 ގައި އޭސީސީގެ ނައިބު ރައީސް އަބްދުލް ސަލާމް އަދި މެންބަރު ތޯހާ މުހައްމަދު އިސްތިއުފާ ދެއްވުމާ ގުޅިގެންނެވެ. މި ދެ ބޭފުޅުން އިސްތިއުފާ ދެއްވީ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އެ ދެ ބޭފުޅުންނާ މެދު ބޮޑެތި ތުހުމަތުތަކެއް ކުރުމަށްފަހު، މަޤާމުން ވަކިކުރުމަށް މަޖިލީހުގެ ތަޅުމުގައި ވޯޓަށް އެހުމަށް ތައްޔާރުވަމުންދަނިކޮށެވެ.
މިވަގުތު އޭސީސީގައި ތިއްބެވީ ކޮމިޝަންގެ ރައީސް އާދަމް ޝާމިލް، އަދި މެންބަރުންގެ ގޮތުގައި ޝިޔާމާ މުހައްމަދާއި ޝަޒްނާ ހާޝިމެވެ. އޭސީސީ އަދި އިލެކްޝަންސް ކޮމިޝަންގެ ރައީސްއާއި ނައިބު ރައީސްގެ މަޤާމަކީ ރައީސުލްޖުމްހޫރިއްޔާ އައްޔަންކުރައްވާ މަޤާމުތަކެއްގެ ގޮތުގައި ހަމަޖެއްސުމަށް އެ މުއައްސަސާތަކުގެ ޤާނޫނު އިޞްލާޙު ކުރެވިފައިވީ ނަމަވެސް، މި އިޞްލާޙާ އެއްގޮތަށް އަދި އެއްވެސް މެމްބަރަކު އައްޔަން ކޮށްފައެއް ނުވެއެވެ.
