ފާއިތުވި ނޮވެމްބަރު މަހު ފުލުހުންގެ ޚިދުމަތަށް އެންމެ ގިނައިން ހުށަހެޅިފައިވަނީ ވައްކަމުގެ މައްސަލަތައްކަމަށް ފުލުހުންގެ ތަފާސްހިސާބުތަކުން ދައްކައިފިއެވެ.
ނޮވެމްބަރު މަހު ވައްކަމުގެ 310 މައްސަލަ ހުށަހެޅުނު އިރު، މަސްތުވާތަކެތީގެ 129 މައްސަލައާއި، ފޭރުމުގެ 32 މައްސަލަ ހުށަހެޅިފައިވެއެވެ. މީގެ އިތުރުން މަގުމަތީގައި ހިނގާ އެކްސިޑެންޓްތަކުގެ 236 މައްސަލައާއި، މުދަލަށް ގެއްލުން ދިނުމުގެ 46 މައްސަލަ ވަނީ ހުށަހެޅިފައެވެ. އަދި މަކަރާއި ހީލަތުގެ 11 މައްސަލައާއި ޖިންސީ ގޯނާގެ 24 މައްސަލަވެސް ވަނީ ފުލުހުންނަށް ހުށަހެޅިފައެވެ.
އަނިޔާވެރިކަމުގެ މައްސަލަތަކަށް ބަލާއިރު، އާންމު އަނިޔާގެ 63 މައްސަލައާއި، ގެވެށި އަނިޔާގެ 18 މައްސަލަ ހުށަހެޅިފައިވެއެވެ. އަދި ލިޔެކިޔުން ފޯޖުކުރުމުގެ 11 މައްސަލައާއި އެކި ބާވަތުގެ ތަކެތި ގެއްލުމުގެ 67 މައްސަލަވެސް ވަނީ ފުލުހުންނަށް ހުށަހެޅިފައެވެ.
އޮކްޓޯބަރު މަހާ އަޅާބަލާއިރު، ނޮވެމްބަރުގައި ވައްކަމުގެ މައްސަލަތައް ވަނީ ކޮންމެވެސް ވަރަކަށް އިތުރުވެފައެވެ. އޮކްޓޯބަރު މަހު ހުށަހެޅުނު 303 ވައްކަމުގެ މައްސަލައާއި އަޅާބަލާއިރު، ނޮވެމްބަރުގައި ވަނީ 310 މައްސަލަ ހުށަހެޅިފައެވެ. ނަމަވެސް ޓްރެފިކް އެކްސިޑެންޓްތައް ވަނީ މަދުވެފައެވެ. އޮކްޓޯބަރުގައި 283 އެކްސިޑެންޓް ހިނގި އިރު، ނޮވެމްބަރުގައި ހިނގާފައިވަނީ 236 އެކްސިޑެންޓެވެ.
ފުލުހުންގެ ތަފާސްހިސާބުތަކުން ދައްކާގޮތުން ކޮންމެ މަހެއްގައިވެސް އެންމެ ގިނައިން ހުށަހެޅެނީ ވައްކަމާއި މަސްތުވާތަކެތީގެ މައްސަލަތަކެވެ. ޚާއްސަކޮށް މީސްމީޑިއާ މެދުވެރިކޮށް ހިންގާ އޮންލައިން ފޭރުމުގެ މައްސަލަތައް ވަނީ ފާހަގަކުރެވޭ މިންވަރަކަށް އިތުރުވެފައެވެ. މިފަދަ މައްސަލަތައް ހުއްޓުވުމަށް ފުލުހުން ދަނީ ގިނަގުނަ މަސައްކަތްތަކެއް ކުރަމުންނެވެ
