މިއަދު މާލޭގެ އާޓީފިޝަލް ބީޗު ސަރަހައްދުގައި ބިދޭސީންތަކެއްގެ މެދުގައި މާރާމާރީއެއް ހިނގައިފިއެވެ.
ފުލުހުން މައުލޫމާތު ދެއްވާފައިވާ ގޮތުގައި މިއަދު އިރުއޮއްސި 18:22 ހާއިރު އާޓިފިޝަލް ބީޗު ސަރަހައްދުގައި ހިނގި މާރާމާރީގެ މައްސަލައެއް ފުލުހުންނަށް ރިޕޯޓުކުރެވުނެވެ. މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވިނަމަވެސް، މައްސަލައާ ގުޅިގެން ބަލަންޖެހޭ ކަންކަން ފުލުހުން ބަލަމުންދާކަން އެފަރާތުން ހާމަކޮށްފައިވެއެވެ.
މީސްމީޑިއާގައި މިހާރު ދައުރުވަމުންދާ މި މާރާމާރީގެ ވީޑިއޯއިން ދައްކާގޮތުގައި، މާރާމާރީ ހިނގާފައިވަނީ ބިދޭސީންގެ ދެ ގްރޫޕެއްގެ މެދުގައެވެ. މި މާރާމާރީ ހިނގިއިރު، އާޓިފިޝަލް ބީޗު ސަރަހައްދުގައި ގިނަ އަދަދެއްގެ މީހުން ތިބިކަންވެސް ވީޑިއޯއިން ފެންނަން އޮތެވެ.
މި ހާދިސާއާ ގުޅޭ އެހެން ވީޑިއޯއެއްގައި ފެންނަ ގޮތުގައި، މި މާރާމާރީގެ ތެރޭގައި ދިވެހި ކުޑަކުއްޖަކަށް ހާނިއްކަވެފައިވާކަމާއި، އެކަމާ ގުޅިގެން އެކުއްޖާގެ އާއިލާއިން ކަންބޮޑުވުން ފާޅުކުރާ މަންޒަރު ފެނިގެންދެއެވެ. މައުލޫމާތު ލިބިފައިވާ ގޮތުގައި، އާޓިފިޝަލް ބީޗު ސަރަހައްދުގައި ޚާއްސަކޮށް ހުކުރު ދުވަސްތަކުގައި ބިދޭސީންގެ މެދުގައި ހިނގާ މާރާމާރީތަކުގެ އަދަދު މިހާރު ވަނީ އިތުރުވެފައެވެ.
