މިއަހަރު މިހާތަނަށް ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީ.އެސް.އައި.ޕީ) އަށް 597 މިލިއަން ޔޫ.އެސް ޑޮލަރު ޚަރަދުކޮށްފައިވާކަމަށް މިނިސްޓްރީ އޮފް ފިނޭންސްއިން ހާމަކޮށްފިއެވެ.
ޕީ.އެސް.އައި.ޕީ އަކީ ސަރުކާރުން އިންފްރާސްޓްރަކްޗަރ ގާއިމުކުރުމަށް އިސްކަންދޭ މައިގަނޑު ތަރައްގީގެ މަޝްރޫއުތައް ހިމެނޭ މެދުރާސްތާ ޕްލޭނެކެވެ. ރައްޔިތުންގެ މަޖިލީހުން ފާސްކުރި 2024 ވަނަ އަހަރުގެ ބަޖެޓުގައި ޕީ.އެސް.އައި.ޕީ މަޝްރޫއުތަކަށް 577.3 މިލިއަން ޔޫ.އެސް ޑޮލަރު ކަނޑައެޅިފައިވެއެވެ. އޮކްޓޯބަރު މަހު ފާސްކުރެވުނު 330.6 މިލިއަން ޔޫ.އެސް ޑޮލަރުގެ ސަޕްލިމެންޓަރީ ބަޖެޓުން އިތުރު 129.9 މިލިއަން ޔޫ.އެސް ޑޮލަރު ކަނޑައެޅިފައިވާތީ، މިއަހަރު ޕީ.އެސް.އައި.ޕީ އަށް ޖުމްލަ 707.4 މިލިއަން ޔޫ.އެސް ޑޮލަރު ހަމަޖެހިފައިވެއެވެ.
މިނިސްޓްރީ އޮފް ފިނޭންސްއިން ޝާއިޢުކުރާ ހަފްތާގެ ފިސްކަލް ރިޕޯޓުގައިވާ ގޮތުން، ނޮވެމްބަރު 18 ގެ ނިޔަލަށް މަގު ހެދުމާއި، ބިންހިއްކުމާއި، ދަތުރުފަތުރާ ގުޅޭ މަޝްރޫޢުތައް ހިމެނޭގޮތަށް ޕީ.އެސް.އައި.ޕީ އަށް ބަޖެޓުން 597.5 މިލިއަން ޔޫ.އެސް ޑޮލަރު ޚަރަދުކުރެވިފައިވެއެވެ.
ޕީ.އެސް.އައި.ޕީ ބަޖެޓު ޚަރަދުކުރެވިފައިވާ ގޮތުގެ ތަފްސީލު ތިރީގައި މިވަނީއެވެ:
* އެއަރޕޯޓް ތަރައްގީކުރުން: 149.3 މިލިއަން ޔޫ.އެސް ޑޮލަރު
* ބިން ހިއްކުން: 129.9 މިލިއަން ޔޫ.އެސް ޑޮލަރު
* ފާލަމުގެ މަޝްރޫޢުތައް: 64.5 މިލިއަން ޔޫ.އެސް ޑޮލަރު
* ބޯހިޔާވަހިކަމުގެ މަޝްރޫޢުތައް: 45.3 މިލިއަން ޔޫ.އެސް ޑޮލަރު
* މަގު ތަރައްގީކުރުމުގެ މަޝްރޫޢުތައް: 3.7 މިލިއަން ޔޫ.އެސް ޑޮލަރު
* ބަނދަރު މަޝްރޫޢުތައް: 21.87 މިލިއަން ޔޫ.އެސް ޑޮލަރު
ކުރިއަށް އޮތް އަހަރަށް ފާސްކުރެވިފައިވާ 3.67 ބިލިއަން ޔޫ.އެސް ޑޮލަރުގެ ޖުމްލަ ބަޖެޓުން، 800 މިލިއަން ޔޫ.އެސް ޑޮލަރު ވަނީ ޚާއްސަކޮށް ޕީ.އެސް.އައި.ޕީ އަށް ކަނޑައެޅިފައެވެ. ޕީ.އެސް.އައި.ޕީ މަޝްރޫޢުތައް އެކަށީގެންވާ ގޮތެއްގައި ތަންފީޒުކުރުމަށް ޚާއްސަ ފިޔަވަޅުތަކެއް އެޅުމަށް ސަރުކާރުން ވަނީ އެއްބަސްވެފައެވެ. މިގޮތުން، ޚާއްސަ ފަންޑެއް ގާއިމުކުރެވި، އަލަށް ފަށާ މަޝްރޫޢުތައް ވަކި ސިޔާސަތުތަކެއްގެ ދަށުން ކުރިއަށް ގެންދެވޭނެއެވެ.
