މާލޭގެ އެއްގަމު ތޮށި މަރާމާތުކުރުމުގެ މަޝްރޫޢުގެ ޑީޓެއިލް ޑިޒައިނިންގ މަސައްކަތް ކުރުމަށް ކޮންސަލްޓަންޓަކާއެކު ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީން އެއްބަސްވުމުގައި ސޮއިކޮށްފިއެވެ.
މިދިޔަ އަންގާރަ ދުވަހު ސޮއިކުރެވުނު މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރ އިބްރާހީމް ތޮއާމް މުހައްމަދެވެ. އަދި ކޮންސަލްޓަންޓް ޓީމުގެ ފަރާތުން ސޮއިކުރެއްވީ ޗީފް ކޮންސަލްޓަންޓް ހިރޯމީ ނަމިކީއެވެ. މިނިސްޓްރީން ހާމަކުރި ގޮތުގައި މި އެއްބަސްވުމުގެ ދަށުން ކުރެވޭ ޑިޒައިނިންގ މަސައްކަތް 2025 ވަނަ އަހަރުގެ ފުރަތަމަ ކުއާޓަރގެ ނިޔަލަށް ނިންމުމަށް ވަނީ ރޭވިފައެވެ.
މި މަޝްރޫޢަކީ "ޕްރޮޖެކްޓް ފޮ ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލެންޑް" ގެ ނަމުގައި ޖަޕާނު ސަރުކާރުގެ އެހީގައި ކުރިއަށްގެންދާ މަޝްރޫޢެކެވެ. މި މަޝްރޫޢު ކުރިއަށް ގެންދިއުމަށް ދިވެހި ސަރުކާރާއި ޖަޕާނު ސަރުކާރާ ދެމެދު އެކްސްޗޭންޖް އޮފް ނޯޓްސްގައި ސޮއިކުރެވިފައިވަނީ މިދިޔަ ސެޕްޓެމްބަރު 19 ވަނަ ދުވަހުއެވެ. އަދި ގްރާންޓް އެއިޑްގެ އެއްބަސްވުމުގައި ސޮއިކުރެވުނީ އޮކްޓޫބަރު 28 ވަނަ ދުވަހުއެވެ.
ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށްގެންދެވޭ މި މަޝްރޫޢަށް 20 މިލިއަން ޖަޕަނީސް ޔެން (140،000 ޑޮލަރު) ހިލޭ އެހީގެ ގޮތުގައި ދިނުމަށް ޖަޕާނު ސަރުކާރުން ވަނީ ނިންމާފައެވެ.
މިނިސްޓަރ މޫސާ ޒަމީރު މި މަޝްރޫޢާ ގުޅޭގޮތުން ކުރިން ދެއްވި ބަޔާނެއްގައި ވިދާޅުވެފައިވަނީ، މިއީ ކަނޑުގެ ލޮނުގަނޑު އުފުލުމާއި މޫސުމާ ގުޅުންހުރި އެހެނިހެން ކާރިސާތަކުގެ ނުރައްކަލުން ރާއްޖެ ސަލާމަތްކުރުމަށް މުހިންމު މަޝްރޫޢެއް ކަމަށެވެ. އަދި އަންނަން އޮތް ޖީލުތަކަށް ދެމެހެއްޓެނިވި ރައްކާތެރިކަން ފޯރުކޮށްދޭނެ މަޝްރޫޢެއްގެ ގޮތުގައި މިނިސްޓަރު މި މަޝްރޫޢު ސިފަކުރެއްވިއެވެ.
