ކެފޭ އަދި ރެސްޓޯރެންޓް ފަދަ ކާބޯތަކެތީގެ ޚިދުމަތްދޭ ތަންތަނުގެ މަނާ ސަރަޙައްދުތަކުގައި ދުންފަތުގެ އިސްތިޢުމާލުކުރާނަމަ، އެފަދަ ތަންތަނުގެ ވިޔަފާރި ހުއްދަ ބާޠިލުކުރެވޭ ގޮތަށް ދުންފަތް ކޮންޓްރޯލްކުރުމުގެ ޤާނޫނަށް އިޞްލާޙު ގެނައުމަށް ނިންމާފައިވާކަން ހެލްތު މިނިސްޓްރީން މިއަދު ހާމަކޮށްފިއެވެ.
2010 ވަނަ އަހަރުގެ އޮގަސްޓު މަހުގައި ޢަމަލުކުރަން ފެށުނު މި ޤާނޫނުގައި މަނާ ތަންތަނުގައި ދުންފަތުގެ އިސްތިޢުމާލުކުރާ ފަރާތްތައް 500 ރުފިޔާއިން ޖޫރިމަނާކުރެވޭނެކަމަށް ބަޔާންކޮށްފައިވީނަމަވެސް، ފަހަކަށްއައިސް މިކަން ތަންފީޛުކުރެވިފައެއް ނުވެއެވެ. މިއަދު ހެލްތު މިނިސްޓްރީން ބޭއްވި މީޑިއާ ބްރީފިންގގައި ހެލްތު ޕްރޮޓެކްޝަން އެޖެންސީގެ ޑެޕިއުޓީ ޑިރެކްޓަރު ހަސަން މުޙައްމަދު ވިދާޅުވެފައިވަނީ މިކަމުގެ ތަންފީޛީ މަސައްކަތްތައް އެކަށީގެންވާ މިންވަރަށް ކުރިއަށް ނުދާކަމަށެވެ.
އާ އިޞްލާޙުގެ ދަށުން މިނިސްޓްރީއަށް އިތުރު ބާރުތަކެއް ލިބިގެންދާނެކަމަށް ހަސަން ވިދާޅުވެފައިވެއެވެ. މިގޮތުން މަނާ ތަންތަނުގައި ދުންފަތުގެ އިސްތިޢުމާލުކުރާ ތަންތަނުގެ ވެރިފަރާތްތަކާއި މެނޭޖްމަންޓް ޒިންމާދާރުކުރެވޭނެއެވެ. އަދި ޤާނޫނާ ޚިލާފުވާ ތަންތަނުގެ ވިޔަފާރި ހުއްދަ ވަގުތީގޮތުން ހިފެހެއްޓުމާއި ބާޠިލުކުރުމަށް ކަމާބެހޭ އިދާރާތަކަށް ހުށަހެޅުމުގެ އިޚްތިޔާރު މިނިސްޓްރީއަށް ލިބިގެންދާނެއެވެ.
ހެލްތު މިނިސްޓަރު ޢަބްދުﷲ ނާޡިމް އިބްރާހީމް ފާހަގަކުރެއްވި ގޮތުގައި މިކަމަކީ އެންމެން ގުޅިގެން މަސައްކަތްކޮށްގެން ނޫނީ ހާސިލުކުރެވޭނެ ކަމެއް ނޫނެވެ. މިއާއެކު، ސަރުކާރުން ވަނީ މިދިޔަ މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން މަނާކޮށް، މި މަހުގެ 15 އިން ފެށިގެން އެތަކެތި ބޭނުންކުރުން މަނާކުރުމަށް ނިންމާފައެވެ. އަދި ދުންފަތުގެ ބާވަތްތަކުން ނަގާ ޑިއުޓީ މިދިޔަ މަހުގެ އެއްވަނަ ދުވަހުން ފެށިގެން ވަނީ މަތިކޮށްފައެވެ.
