ހުޅުމާލެ ފޭސް 2 ހިތިގަސް މަގުގައި ހިނގި މާރާމާރީއާއި ފޭރުމުގެ މައްސަލައިގައި އިއްޔެ މީހަކު ހައްޔަރުކޮށްފިއެވެ. މި މައްސަލައިގައި ހައްޔަރުކުރެވުނު ފަރާތަކީ ހއ. މާރަންދޫ، އުތުރުގެ، އިބްރާހިމް މުހައްމަދު (40 އަހަރު) އެވެ.
މި ހާދިސާގައި އަނިޔާވި ބިދޭސީ މީހާއަށް ވަޅިން ހަމަލާދީ، މާރާމާރީ ހިންގުމަށްފަހު ފޭރިގަތް ކަމަށް ވަނީ ރިޕޯޓުކުރެވިފައެވެ. އަނިޔާވި ފަރާތަށް އެޗް16 ކްލިނިކްގައި ބޭސްފަރުވާ ދިނުމަށްފަހު ވަނީ ދޫކޮށްލާފައެވެ.
ފުލުހުން އިތުރަށް މައުލޫމާތު ދިން ގޮތުގައި، މި މައްސަލާގައި ތުހުމަތުކުރެވޭ ފަރާތް ދެނެގަނެވިފައިވަނީ ސީސީޓީވީ ފުޓޭޖު ބެލުމަށްފަހުގައެވެ. އަދި މި މައްސަލައިގައި ބައިވެރިވި އިތުރު ފަރާތެއް ހޯދުމުގެ މަސައްކަތް ކުރިއަށްދާ ކަމަށާއި، މައްސަލައިގެ ތަހުގީގު މަސައްކަތް ވެސް ދަނީ ކުރިއަށް ކަމަށް ފުލުހުން މައުލޫމާތު ދީފައިވެއެވެ.
