އިކޮނޮމިކް ރިފޯމް އޮފީހުގެ ކޮމިޝަނަރު އޮފް ރިފޯމުގެ މަގާމަށް މީހަކު ހޯދުމަށް ފިނޭންސް މިނިސްޓްރީން މިއަދު އިއުލާންކޮށްފިއެވެ. މި މަގާމަކީ ދައުލަތުގެ މާލީ ނިޒާމު ހަރުދަނާކުރުމުގެ މަސައްކަތްތައް ކުރިއަށް ގެންދިއުމަށް އަލަށް އުފައްދާފައިވާ މަގާމެކެވެ.
އިއުލާނުގައިވާ ގޮތުން، މި މަގާމަށް ކުރިމަތިލާ ފަރާތްތަކުގައި އެކައުންޓިންގ އެންޑް ފައިނޭންސިންގ ދާއިރާއިން މަދުވެގެން ފުރަތަމަ ޑިގްރީއެއް ހާސިލުކޮށްފައި ވުމާއެކު، މި ދާއިރާގެ 10 އަހަރުގެ މަސައްކަތު ތަޖުރިބާ ލިބިފައިވުން ލާޒިމުވެއެވެ. ޝައުގުވެރިވާ ފަރާތްތަކުން މި މަހުގެ 8 ވަނަ ދުވަހުގެ ނިޔަލަށް ޕްރޮޕޯސަލް ހުށަހަޅަންވާނެއެވެ.
ރިފޯމް ކޮމިޝަނަރުގެ މައިގަނޑު މަސްއޫލިއްޔަތުތަކުގެ ތެރޭގައި ރިފޯމް ސްޓްރެޓެޖީ އެކުލަވާލުމާއި، އިކޮނޮމިކް، އެސްއޯއީ އަދި ފިސްކަލް ރިފޯމްތަކާ ގުޅޭ ޕްރޮގްރެސް ރިޕޯޓުތައް ތައްޔާރުކުރުމާއި، އެކަމާ ގުޅޭ އޮނިގަނޑުތަކާއި ޕްލޭންތައް އެކުލަވާލުން ހިމެނެއެވެ. މި މަގާމަށް ހޮވޭ ފަރާތް މަސައްކަތްކުރާނީ ފިނޭންސް މިނިސްޓްރީގައި، ދެ އަހަރު ދުވަހުގެ ކޮންޓްރެކްޓެއްގެ ދަށުންނެވެ.
އަންނަ އަހަރުގެ ބަޖެޓުގައި ސަރުކާރުގެ ހަރަދުތައް ކުޑަކުރުމަށް ރޭވިފައިވާ ޕްލޭންތަކުގެ ތެރޭގައި ސަބްސިޑީ އަމާޒުކުރެވޭ ފަރާތްތައް އަލުން ކަނޑައެޅުމާއި، ސަރުކާރުގެ ކުންފުނިތަކުގެ ހަރަދުތައް ކުޑަކުރުމަށް އަޅާނެ ފިޔަވަޅުތައް ހިމެނެއެވެ.
