ޗައިނާ ސަރުކާރުން ކ.ގުރައިދޫ ކައުންސިލަށް 100 ސޯލާ މަގުބައްތި ހަދިޔާކޮށްފިއެވެ. މި އެހީތެރިކަން ފޯރުކޮށްދެނީ ޗައިނާގެ ސަފީރުގެ ޚާއްސަ އިސްނެންގެވުމަކަށެވެ.
މި މަގުބައްތިތައް ރަސްމީކޮށް ހަވާލުކުރުމަށް ބޭއްވުނު ޚާއްސަ ރަސްމިއްޔާތުގައި، ޗައިނާގެ ފަރާތުން މި ހަދިޔާ ހަވާލުކޮށްދެއްވީ ރާއްޖެއަށް ކަނޑައަޅުއްވާފައިވާ ސަފީރު ވާންގ ލިޒިންއެވެ. ދިވެހި ސަރުކާރުގެ ފަރާތުން މި ހަދިޔާއާ ހަވާލުވެވަޑައިގަތީ ސިޓީސް، ލޯކަލް ގަވަރނަންސް އެންޑް ޕަބްލިކް ވޯކްސް މިނިސްޓަރު އާދަމް ޝަރީފު އުމަރެވެ.
ރަސްމިއްޔާތުގައި ވާހަކަފުޅު ދައްކަވަމުން ސަފީރު ވާންގ ފާހަގަކުރެއްވި ގޮތުގައި، މި އެހީތެރިކަމަކީ ދެ ގައުމުގެ ވެރިންގެ މެދުގައި ހިނގި މަޝްވަރާތަކުގެ ނަތީޖާއެކެވެ. ޚާއްސަކޮށް ރައީސް ޑރ. މުޢިއްޒު ޗައިނާއަށް ކުރެއްވި ދަތުރުފުޅާ ގުޅިގެން ދެ ގައުމުގެ ގުޅުން އިތުރަށް ބަދަހިވެ، މިފަދަ އެތައް ކަމެއް ކުރިއަށް ގެންދިއުމަށް ވަނީ މަގުފަހިވެފައެވެ.
ޗައިނާ އެމްބަސީގެ ފަރާތުން އިތުރަށް މަޢުލޫމާތު ދެއްވާފައިވާ ގޮތުގައި، މި މަގުބައްތިތައް މިހާރު ވަނީ ރާއްޖެއަށް ގެނައުމުގެ މަސައްކަތް ފެށިފައެވެ. މި މަހުގެ ފަހުކޮޅު ނުވަތަ އަންނަ އަހަރުގެ ޖެނުއަރީ މަހުގެ ކުރީކޮޅު މި ޝިޕްމަންޓް ރާއްޖެއަށް ލިބޭނެ ކަމަށް ލަފާކުރެވެއެވެ.
