ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންގެ ހެދުން އެޅުމާއި ގްރޫމިންގ އާ ގުޅޭ އާންމު މިންގަނޑެއް އެކުލަވާލުމަށް ގޮވާލާ ގަރާރެއް ރައްޔިތުންގެ މަޖިލީހަށް، ކެންދޫ ދާއިރާގެ މެންބަރު މައުރޫފު ޒާކިރު ހުށަހަޅުއްވައިފިއެވެ. މި ގަރާރު މަޖިލީހަށް ތަޢާރަފުކުރުމަށް މިއަދުގެ ޖަލްސާގެ އެޖެންޑާގައި ހިމަނާފައިވެއެވެ.
ގަރާރުގައި ފާހަގަކޮށްފައިވާ ގޮތުގައި، އިސްލާމީ ޝަރީޢަތާއި ރާއްޖޭގެ އެއްވެސް ޤާނޫނަކުން ބުރުގާ އެޅުމާއި ތުނބުޅި މަތިމަސް ބެހެއްޓުން މަނާކޮށްފައި ނުވި ނަމަވެސް، ފަތުރުވެރިކަމުގެ ވިޔަފާރި ހިންގާ ބައެއް ތަންތަނުން އެކުލަވާލާފައިވާ ގްރޫމިންގ އަދި ހެދުން އެޅުމުގެ މިންގަނޑުތަކުގެ ސަބަބުން އަންހެން މުވައްޒަފުން ބުރުގާ އެޅުމަށާއި ފިރިހެން މުވައްޒަފުން ތުނބުޅި މަތިމަސް ބެހެއްޓުމަށް ހުރަސްތަކެއް ކުރިމަތިވެއެވެ.
މި ހުރަސްތަކުގެ ސަބަބުން، ބުރުގާ އަޅައިގެން ނުވަތަ ތުނބުޅި މަތިމަސް ބަހައްޓައިގެން ތިބޭ މީހުންނަށް ފަތުރުވެރިކަމުގެ ދާއިރާގައި މަސައްކަތްކުރުމުގެ ޙައްޤަށް ހުރަސްއެޅޭ ކަމަށް ގަރާރުގައި ބަޔާންކޮށްފައިވެއެވެ. މި ގޮތުން، މި ހުރަސްތައް ނައްތާލައި، ފަތުރުވެރިކަމުގެ ވިޔަފާރިތަކުގެ މުވައްޒަފުންނަށް އަމަލުކުރަންޖެހޭ އެއްހަމަ އަދި އާންމު ގްރޫމިންގ އަދި ހެދުން އެޅުމުގެ މިންގަނޑެއް އެކުލަވާލުމަށް ވަނީ ސަރުކާރަށް ގޮވާލާފައެވެ.
