އިސްރާއީލުގެ ބޮޑުވަޒީރު ނަތަންޔާހޫ ރައްޖެ އަތުވެއްޖެނަމަ ހައްޔަރު ކުރާނެކަމަށް ވިދާޅުވެ، ހޯމް މިނިސްޓަރު އަލީ އިހުސާން ރޭ އެކްސް (ކުރީގެ ޓްވިޓަރ) ގައި ކުރެއްވި ޕޯސްޓެއް ފަހުން ޑިލީޓްކުރެއްވި ސަބަބު މިއަދު ސާފުކޮށްދެއްވައިފިއެވެ. އެ ޕޯސްޓަކީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމާ ގުޅޭ ގޮތުން މިނިސްޓަރު ކުރެއްވި ޕޯސްޓެކެވެ.
މި މައްސަލަ ފެށުނީ ނަތަންޔާހޫ ހައްޔަރުކުރުމަށް ބައިނަލްއަޤްވާމީ ކްރިމިނަލް ކޯޓުން ނެރެފައިވާ އަމުރާ ގުޅިގެން ރާއްޖޭގެ މީޑިއާއަކުން ކުރި ސުވާލަކަށް މިނިސްޓަރު ހަނުހުންނެވި ކަމަށް ރިޕޯޓުކުރުމުންނެވެ. އެ ރިޕޯޓަށް ރައްދު ދެއްވުމުގެ ގޮތުން، މިނިސްޓަރު އެކްސްގައި ވިދާޅުވެފައިވަނީ ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ޤައުމެއް ކަމަށެވެ.
ނަމަވެސް މި ޕޯސްޓް ފަހުން ޑިލީޓްކުރެއްވުމާ ގުޅިގެން ގިނަ ފާޑުކިޔުންތަކެއް އަމާޒުވިއެވެ. މިކަމާ ގުޅިގެން މިނިސްޓަރު މިއަދު ވިދާޅުވެފައިވަނީ، އެ ޕޯސްޓް ޑިލީޓްކުރެއްވީ ބައެއް ހެޔޮއެދޭ ބޭފުޅުން، މީޑިއާއަކަށް ނިސްބަތްކޮށް އެ ވިދާޅުވި ވާހަކައަކީ ރަސްމީ ހައިސިއްޔަތުން ވިދާޅުވުމަށް އެންމެ ރަނގަޅު ވާހަކައެއް ނޫން ކަމަށް ލަފާދެއްވުމުން ކަމަށެވެ.
އެހެންނަމަވެސް މިނިސްޓަރު އަލުން ކުރެއްވި ޕޯސްޓެއްގައި ވެސް ވަނީ ރާއްޖެއަކީ އިންޓަނޭޝަނަލް ކޯޓުތަކުގެ އަމުރުތައް ވަކި މީހަކު އިސްތިސްނާނުކޮށް ތަންފީޒުކުރާނެ ޤައުމެއް ކަމަށް އަލުން ވިދާޅުވެފައެވެ.
