ދިރާގުން ކުޅުދުއްފުށި ސިޓީ ކައުންސިލުގެ ނޮލެޖް ސެންޓަރަށް އެހީތެރިކަން ފޯރުކޮށްދީފިއެވެ. މި އެހީތެރިކަމުގެ ދަށުން، ދިރާގުގެ އިޖްތިމާއީ ޒިންމާގެ ތެރެއިން ނޮލެޖް ސެންޓަރަށް ކޮމްޕިއުޓަރ ސިސްޓަމްތަކާއި، ވީޑިއޯ ކޮންފަރެންސިންގ އާލާތްތަކާއި، އަދި ލައިބްރަރީއަށް ގިނަ އަދަދެއްގެ ފޮތްތައް ހަދިޔާ ކުރެވިފައިވެއެވެ.
ދިރާގުގެ މެނޭޖަރު ކޯޕަރޭޓް ސޯޝަލް ރެސްޕޮންސިބިލިޓީ، ބިޝާރާ ހަމީދު ވިދާޅުވެފައިވަނީ މި ހަދިޔާކުރެވުނު ޑިޖިޓަލް ވަސީލަތްތަކާއި ފޮތްތަކުގެ އެހީގައި ފޮތް ކިޔުމަށް ޝައުގުވެރިވާ މުޖުތަމައެއް އުފެދިގެންދާނެކަމުގެ އުންމީދު އޮތް ކަމަށެވެ. އަދި މި ވަސީލަތްތަކުގެ މައިގަނޑު މަޤްޞަދަކީ ޓެކްނޮލޮޖީއާ ހަމައަށް ވާސިލުވުން ފަސޭހަކޮށްދީ، އުނގެނުމުގެ ޝައުޤުވެރިކަން އިތުރުކޮށް، އަދި ޑިޖިޓަލް ލިޓަރަސީ ކުރިއެރުވުން ކަމުގައި އޭނާ ފާހަގަކުރެއްވިއެވެ.
ކުޅުދުއްފުށި ނޮލެޖް ސެންޓަރަށް މި އެހީތެރިކަން ފޯރުކޮށްދެވުނުކަމީ ވަރަށް އުފާވެރި ކަމެއްކަމަށް ބިޝާރާ ހަމީދު ވިދާޅުވިއެވެ. އަދި މުޖުތަމައުތަކަށް އެކި ގޮތްގޮތުން އެހީތެރިވުމަކީ ދިރާގުގެ މައިގަނޑު އަމާޒުތަކުގެ ތެރެއިން އެއް އަމާޒުކަންވެސް ފާހަގަކުރެއްވިއެވެ. ދިރާގުން މިހާރުވެސް އަންނަނީ އެ ކުންފުނީގެ ސީއެސްއާރްގެ ދަށުން ރާއްޖޭގެ އެކި ރަށްރަށަށް ބޭނުންވާ އެހީތެރިކަން ފޯރުކޮށްދެމުންނެވެ.
ފާހަގަކޮށްލެވޭ ކަމަކީ، ކުޅުދުއްފުށީ ނޮލެޖް ސެންޓަރަކީ ހަމައެކަނި ޕަބްލިކް ލައިބްރަރީއެއް އެކަނި ނޫންކަމެވެ. މިއީ ވެލްނަސް ސެންޓަރަކާ އެކުގައި ގާއިމުކުރެވިފައިވާ ޚާއްޞަ މަރުކަޒެކެވެ.
