ޗައިނާގެ ސަފީރު ވޭންގް ލީޝިން ދައުރު ހަމަކުރައްވާ ރާއްޖެއިން ވަޑައިގަންނަވަން ތައްޔާރު ވެއްޖެއެވެ. މިނިސްޓްރީ އޮފް ފޮރިން އެފެއާޒްގައި ބޭއްވުނު، ފޮރިން މިނިސްޓަރ ޑރ. އަބްދުﷲ ހަލީލާ ބައްދަލުކުރެއްވުމަށްފަހު، ސަފީރުގެ ދައުރުގައި އަދާކުރެއްވި މުހިއްމު މަސައްކަތްތަކަށާއި، ދިވެހިރާއްޖެއާއި ޗައިނާއާ ދެމެދު އޮތް ގުޅުން ކުރިއެރުވުމަށް ދެއްވި އެހީތެރިކަމަށް މިނިސްޓަރު ޝުކުރު އަދާކުރެއްވިއެވެ.
ސަފީރު ވޭންގް ވަނީ އެކަމަނާގެ ދައުރުގައި ދިވެހި ސަރުކާރުން ދެއްކެވި ގާތްކަމަށާއި، މަސްއޫލިއްޔަތުތައް އަދާކުރެއްވުމުގައި ދެއްވި އެއްބާރުލެއްވުމަށް ދިވެހި ސަރުކާރަށާއި ރައްޔިތުންނަށް ޝުކުރު އަދާކުރައްވާފައެވެ. އަދި ކުރިއަށް އޮތްތަނުގައިވެސް ދެ ޤައުމުގެ ގުޅުން އިތުރަށް ވަރުގަދަވެގެންދާނެ ކަމުގެ އުއްމީދު ފާޅުކުރެއްވިއެވެ.
ބައްދަލުވުމުގައި ވޭތުވެދިޔަ އަހަރު ތެރޭގައި ކުރެވުނު މަސައްކަތްތަކާއި، ހާސިލުކުރެވުނު ކާމިޔާބީތަކުގެ އިތުރުން، މިހާރު ކުރިއަށްދާ މަޝްރޫޢުތަކުގެ މަޢުލޫމާތާއި ކުރިއަށް ރޭވިފައިވާ މަސައްކަތްތަކާ ބެހޭގޮތުން ދެ ބޭފުޅުން މަޝްވަރާކުރެއްވިއެވެ. ބައްދަލުވުން ނިމުމުގެ ކުރިން، މިނިސްޓަރު ވަނީ ސަފީރަށް ކުރިއެރުމާއި ކާމިޔާބީއަށް އެދިވަޑައިގެން، ދިވެހިރާއްޖޭގެ ގާތް ރަޙްމަތްތެރިއެއްގެ ގޮތުގައި ކުރިމަގުގައިވެސް ރާއްޖެއަށް ޒިޔާރަތްކުރެއްވުމަށް ދަޢުވަތު ދެއްވާފައެވެ.
