އިޒްރޭލާއި ހިޒްބުﷲ އާ ދެމެދު ހިނގަމުން އަންނަ ހަނގުރާމަ ނިމުމަކަށް ގެނައުމަށް ދެ ފަރާތުން އެއްބަސްވެފައިވާއިރު، މި އެއްބަސްވުމަށް އަމަލުކުރަން ފަށާނީ މިއަދު ހެނދުނުންނެވެ. މި އެއްބަސްވުމާ ގުޅޭ މަޝްވަރާތައް ހިޒްބުﷲ ގެ ފަރާތުން އިޒްރޭލާއެކު ކުރިއަށް ގެންގޮސްފައިވަނީ ލުބްނާނުގެ ސަރުކާރުންނެވެ.
އެމެރިކާއާއި ފްރާންސްގެ މުހިންމު ބައިވެރިވުމާއެކު އެކުލަވާލި މި އެއްބަސްވުމުގައިވާ ގޮތުން، އިޒްރޭލުގެ ސިފައިން 60 ދުވަހުގެ ތެރޭގައި ލުބްނާނުގެ ދެކުނުގެ ސަރަހައްދުތަކުން ފައިބަން ޖެހޭނެއެވެ. އަދި އެ ސަރަހައްދުތަކުގެ ކޮންޓްރޯލް އަނބުރާ ލުބްނާނުގެ އަސްކަރިއްޔާއިން ނަގާއިރު، މިކަން މޮނިޓަރކުރުމަށް އެމެރިކާއާއި ފްރާންސްގެ ސުލްހަ ބަލަހައްޓާ ފައުޖުތައް ހަރަކާތްތެރިވާނެއެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައިވަނީ ހަނގުރާމަ ނިމުމަކަށް ގެންނަން އެއްބަސްވީ އިރާނުގެ ނުރައްކަލަށް ފޯކަސްކުރުމަށާއި، ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާޢަތާ ދެކޮޅަށް ކުރާ މަސައްކަތް އިތުރަށް ވަރުގަދަކުރުމަށް ކަމަށެވެ. ލުބްނާނުގެ ބޮޑުވަޒީރު ނަޖީބް މިކާތީ މި އެއްބަސްވުމަށް މަރުހަބާ ކިޔުއްވައި، އެމެރިކާއާއި ފްރާންސުން އަދާކުރި ދައުރަށް އެ ދެ ގައުމަށް ޝުކުރު އަދާކުރައްވާފައިވެއެވެ.
އިޒްރޭލުން މިދިޔަ އަހަރުގެ އޮކްޓޫބަރު 8 ވަނަ ދުވަހުން ފެށިގެން ލުބްނާނަށް ދެމުންދިޔަ ހަމަލާތަކުގައި 3،768 މީހުން ޝަހީދުވެފައިވާއިރު، އިއްޔެ އެކަނި ވެސް އިޒްރޭލުން ދިން ހަމަލާތަކުގައި 25 މީހަކު ޝަހީދުވެފައިވެއެވެ. މި ހަމަލާތަކުގެ ރައްދުގައި ހިޒްބުﷲ އިން ވެސް އިޒްރޭލަށް ހަމަލާތައް ދީފައިވެއެވެ.
