އިޒްރާއީލް ޕާސްޕޯޓު މަނާކުރުމުގެ މައްސަލައިގައި އިޒްރާއީލުން ރާއްޖެ އަންނަ ފަތުރުވެރިންގެ އަދަދުތައް ބަލައި، ކަމާ ގުޅޭ އިދާރާތަކާއި ސިޔާސީ ޕާޓީތަކާ މަޝްވަރާކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން މިއަދު ނިންމައިފިއެވެ.
މިއަދު ބޭއްވުނު ކޮމިޓީ ބައްދަލުވުމުގައި ނިންމާފައިވަނީ ހުރިހާ ސިޔާސީ ޕާޓީތަކާއެކު، ބަންޑާރަ ނައިބުގެ އޮފީސް، އިކޮނޮމިކް މިނިސްޓްރީ، ޓޫރިޒަމް މިނިސްޓްރީ، އިމިގްރޭޝަން، މަޓީ އަދި އެހެނިހެން ކަމާގުޅޭ ޖަމްޢިއްޔާތަކާ ބައްދަލުކުރުމަށެވެ. އަދި ރާއްޖެ އަންނަ އިޒްރާއީލު ފަތުރުވެރިންނާއި އެހެނިހެން ބޭނުންތަކުގައި އަންނަ އެ ގައުމުގެ މީހުންނާ ގުޅޭ މަޢުލޫމާތުތައް ހޯދުމަށް ކަމާބެހޭ އިދާރާތަކަށް ހުށަހެޅުމަށްވެސް ވަނީ ނިންމާފައެވެ.
ކޮމިޓީގެ މި ނިންމުން ފާސްކޮށްފައިވަނީ ބައްދަލުވުމުގައި ބައިވެރިވި މެންބަރުންގެ އަޣުލަބިއްޔަތުންނެވެ. ވޯޓުގައި ވަކި ގޮތަކަށް ވޯޓު ދެއްވަން ބޭނުންނުވާކަމަށް ވިދާޅުވެފައިވަނީ އެމްޑީޕީގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) އެކަނި ކަމަށްވާއިރު، އެއްވެސް މެންބަރަކު ދެކޮޅަކަށް ވޯޓު ދެއްވާފައެއް ނުވެއެވެ.
ޕީއެންސީން މިހާރު ވަނީ ކަމާ ބެހޭ ފަރާތްތަކުގެ އިރުޝާދާއި ލަފާގެ މަތިން، ތާވަލާ އެއްގޮތަށް ހަލުވިކަމާއެކު އިޒްރާއީލް ޕާސްޕޯޓް މަނާ ކުރުމުގެ މަސައްކަތް ކުރިއަށް ގެންދާނެކަމުގެ ޔަގީންކަން ދީފައެވެ. އިޝާރާތްކޮށްލެވޭ ގޮތުގައި އިޒްރާއީލް ޕާސްޕޯޓު މަނާކުރުމަށް ސަރުކާރުން ނިންމާފައިވަނީ އިޒްރާއީލުން ފަލަސްތީނުގެ ރައްޔިތުންނަށް ދެމުންދާ ލާއިންސާނީ ހަމަލާތަކާ ގުޅިގެންނެވެ.
