ރައީސް ޑރ. މުހައްމަދު މުއިއްޒުގެ ސަރުކާރުން ގައުމުގެ އިގްތިސާދީ ހާލަތު ދަށްވެފައިވާތީ، ރައްޔިތުންނަށް ދެމުން އައި ސަބްސިޑީތައް ކަނޑާލައި ގެނައި ބޮޑެތި ބަދަލުތަކާ ގުޅިގެން ރައީސް އަބްދުﷲ ޔާމީން އަބްދުލް ގައްޔޫމް ސަރުކާރަށް ފާޑުވިދާޅުވެއްޖެއެވެ.
ރޭ ބޭއްވުނު ޕީއެންއެފްގެ ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވެފައިވަނީ މި ސަރުކާރު އޮތީ ރައްޔިތުންގެ ފަޅީގައި ނޫން ކަމަށާއި، ރައްޔިތުންނަށް ހެޔޮއެދޭ ސަރުކާރަކުން އިގްތިސާދީ ހާލަތު ރަނގަޅުކުރުމަށް ރައްޔިތުން ބިކަކޮށް ނުލާނެ ކަމަށެވެ.
އެމަނިކުފާނުގެ ވާހަކަފުޅުގައި، މިހާ ދަތި ދުވަސްވަރެއްގައި ރައްޔިތުންނަށް ލިބެމުންދިޔަ މަންފާތައް ކަނޑާލުމުން، މި ސަރުކާރަށް ކުރީގެ ސަރުކާރުތަކެކޭ އެއްފަދައިން ރައްޔިތުންނަށް ފައިސާ ހޭދަކުރެވެން ނެތްކަން އެނގޭ ކަމަށް ފާހަގަކުރެއްވިއެވެ. އަދި މަސްވެރިންނަށް ތެޔޮ ގަތުމަށް ދެމުން އައި ސަބްސިޑީތައް ކަނޑާލުމުން، މަސްވެރިންނަށް ބަރާބަރަށް ފައިސާ ނުދެވޭ އިރު އިތުރަށް އެ ފަރާތްތައް ބިކަވެގެންދާނެ ކަމަށް ރައީސް ޔާމީން ވިދާޅުވިއެވެ.
މީގެއިތުރުން، އާސަންދަ ލިމިޓްކޮށް ވަކި ބަޔަކަށް އެކަނި ލިބޭގޮތަށް ސަރުކާރުން ނިންމި ނިންމުމާމެދު ރައީސް ޔާމީން ވަނީ ވަރަށް ބޮޑު ކަންބޮޑުވުން ފާޅުކުރައްވާފައެވެ.
އިގްތިސާދީގޮތުން ދަތި ދަނޑިވަޅެއްގައި ސަރުކާރުން ނިންމެވި މި ނިންމެވުމަކީ އެއްވެސް ވަރަކަށް ބަލައިގަނެވޭނެ ކަމެއް ނޫންކަމަށް އެމަނިކުފާނު ވިދާޅުވިއެވެ. އާސަންދައަކީ ރައްޔިތުން ވަރަށް ބޮޑަށް ބަރޯސާވެފައިވާ ކަމެއް ކަމަށްވާއިރު، މިފަދަ ނިންމުމެއް ނިންމުމަކީ ހާލުގައި އުޅޭ ފަރާތްތަކަށް ދެވުނު ވަރަށް ބޮޑު އަނިޔާއެއް ކަމަށްވެސް ރައީސް ޔާމީން ވަނީ ވިދާޅުވެފައެވެ.
