ރާއްޖޭގައި ކުއްލި ހާލަތްތަކުގައި އެހީތެރިކަމާއި ރައްކާތެރިކަމަށް އެދި ގުޅުމަށް "ޝޯޓްކޯޑް ލައިން" 911 ރޭ އިފްތިތާހުކޮށްފިއެވެ.
ކުއްލި ހާލަތްތަކަށް ގައުމީ ހެލްޕް ލައިނެއް ގާއިމުކުރުމަށް ހެލްތު މިނިސްޓްރީން ސޯޝަލް ކައުންސިލަށް ހުށަހެޅުމުން، އެ ހުށަހެޅުން ފާސްކޮށް، އޮކްޓޯބަރު މަހުގެ ތެރޭގައި މަސައްކަތް ފެށިއެވެ.
އިފްތިތާހީ ރަސްމިއްޔާތުގައި ވާހަކަފުޅު ދައްކަވަމުން ހޯމް މިނިސްޓަރު އަލީ އިހުސާން ވިދާޅުވީ ރެއަކީ ރާއްޖެ ރަންއަކުރުން ފަވާލެވޭނެ ރެއެއް ކަމަށެވެ. މި ހިދުމަތް ގާއިމުކޮށްފައިވަނީ ޕޮލިހުންގެ މުއައްސަސާގައެވެ. ޕޮލިހަށް ކަމެއް ރިޕޯޓުކުރުމުގެ އިތުރުން، އެމްބިއުލާންސްގެ ހިދުމަތާއި ކޯސްޓްގާޑާއި ފަޔާ އެންޑް ރެސްކިޔު ހިދުމަތް ވެސް 911 އިން ލިބޭނެކަމަށް އިހުސާން ވިދާޅުވިއެވެ.
މިނިސްޓަރު ވިދާޅުވި ގޮތުގައި، 911 ނަންބަރު އިހުތިޔާރު ކުރެވުނީ އެންމެ ގިނަ މީހުންނަށާއި ކުޑަކުދިންނަށް ވެސް ފަސޭހައިން ހަނދާން ބެހެއްޓޭނެ ނަންބަރަކަށް ވާތީއެވެ. އެއީ ފިލްމުތަކާއި ކާޓޫނުތަކުން ވެސް އަބަދު ފެންނަ ނަންބަރެއް ކަމަށްވުމާއެކު، ރައްޔިތުންނަށް ހަނދާންކުރަން އެންމެ ފަސޭހަވާނެ ނަންބަރު ކަމުގައި ވެސް އެމަނިކުފާނު ފާހަގަކުރެއްވިއެވެ.
ރޭ ފެށުނު މި ހިދުމަތުގެ ފެންވަރު އިތުރަށް ރަނގަޅުކުރުމަށް، ކޮމިޔުނިކޭޝަން ސިސްޓަމްތައް އެޑްވާންސްކުރުމާއި، ޖީއައިއެސް މެޕް ނިޒާމަކަށް ބަދަލުކުރުމާއި، ރާއްޖޭގެ އެކި ކަންކޮޅުތަކުގައި ހުރި ޑިސްޕެޗް ސެންޓަރުތަކުން ވެސް ހިދުމަތް ލިބޭނެ ގޮތް ހެދުމާއި، ހާދިސާ ހިނގާ ތަންތަނަށް ދެވޭ ވަގުތު އަވަސްކުރުމާއި، މުވައްޒަފުންނަށް ތަމްރީނު ދިނުމުގެ މަސައްކަތްތައް ކުރިއަށް ގެންދާނެ ކަމަށް މިނިސްޓަރު ވިދާޅުވިއެވެ. އޭނާ ވަނީ އާންމުންނަށް ދެވޭ މި މުހިންމު ހިދުމަތް ނަހަމަ ގޮތުގައި ބޭނުން ނުކުރުމަށް ވެސް އިލްތިމާސްކުރައްވާފައެވެ.
