ފުލުހުން މިހާތަނަށް 48 ޑްރަގް ކެފޭ ބަންދުކޮށްފައިވާކަމަށާއި މާލޭގައި މަސްތުވާތަކެތީގެ މުއާމަލާތް ހިންގާކަމަށް ތުހުމަތުކުރެވޭ ތަންތަނުގައި ފުލުހުން ޑިއުޓީ ކުރަމުންދާ ކަމަށް ޑްރަގް އެންފޯސްމަންޓް ޑިޕާޓްމަންޓުގެ ހެޑް، ސުޕްރިޓެންޑެންޓް އޮފް ޕޮލިސް ނާހިދު ހުސެއިން މިއަދު ވިދާޅުވެއްޖެއެވެ.
އަދި އޭގެ އިތުރަށް މަސްތުވާތަކެއްޗަށް ދެވިހިފާފައިވާ 49 މީހަކު މަސްތުން ސަލާމަތްވުމުގެ ފަރުވާއަށް އެންޑީއޭއާ ހަވާލުކޮށްފައިވާކަމަށްވެސް އޭނާ ވިދާޅުވެފައި ވެއެވެ. މިހާތަނަށް ހުށަހެޅުނު 683 މައްސަލައިގެ ތެރެއިން 345 މައްސަލައެއްގެ ތަހުގީގު ނިންމައި ޕީޖީ އޮފީހަށް ފޮނުވާފައިވެއެވެ. އޭގެތެރެއިން ޑްރަގް ޓްރެފިކިންގގެ 19 މައްސަލައެއްގައި 22 މީހެއްގެ މައްޗަށް ކޯޓުތަކުން ހުކުމްކޮށްފައިވެއެވެ.
ފުލުހުން މިހާތަނަށް 1009 މީހަކު ހައްޔަރުކޮށް، 12،561 މީހުން ފާސްކޮށްފައިވެއެވެ. 12 އަތޮޅެއްގައި 158 އޮޕަރޭޝަން ހިންގައި، 183 ކިލޯއަށްވުރެ ގިނަ ޑްރަގާއި 8400 އަށްވުރެ ގިނަ ބަނގުރާ ފުޅި އަތުލައިގަނެފައިވެއެވެ. މި ތަކެތީގެ މަގުމަތީ އަގަކީ 385 މިލިއަނަށްވުރެ ގިނަ ރުފިޔާއެވެ.
ޑްރަގްސްގެ މައްސަލަތަކުގައި 142 ބިދޭސީން ޑިޕޯޓުކުރުމަށް އިމިގްރޭޝަނާ ހަވާލުކޮށްފައިވެއެވެ. އަދި ބަނގުރަލުގެ ވަގު ވިޔަފާރި ހުއްޓުވުމަށް 58 ސަފާރީއެއް ބަލައި ފާސްކޮށްފައިވެއެވެ.
ނާހިދު ވިދާޅުވީ ޑްރަގްސްގެ މައްސަލަތައް ހައްލުކުރުމަށް ހުރި ގޮންޖެހުންތަކާ ގުޅިގެން މަސްތުވާތަކެއްޗާބެހޭ ގާނޫނަށް އިސްލާހުތަކެއް ގެނައުމަށް ޑްރާފްޓެއް އޭޖީ އޮފީހަށް ފޮނުވާފައިވާ ކަމަށެވެ. މި އިސްލާހުތަކުގައި ޑްރަގް ޓްރެފިކަރުންނަށް ހަރުކަށި އަދަބު ދިނުމާއި، ބޭނުންކުރާ މީހުންނަށް ފުރިހަމަ ފަރުވާ ދިނުމާއި، ވިޔަފާރިކުރާ މީހުންގެ މުދާ ދައުލަތަށް ނެގުމާއި، ކުޑަކުދިން ބޭނުންކޮށްގެން ވިޔަފާރިކުރާ މީހުންނަށް ހަރުކަށި އަދަބު ދިނުން ހިމެނެއެވެ.
