ހުޅުމާލޭ ސެންޓްރަލް ޕާކު ސަރަހައްދުގައި ހިނގި އެކްސިޑެންޓެއްގައި، ސަމާހު މަރުވި މައްސަލާގައި، ކާރު ދުއްވަން އިން ސ. ހިތަދޫ، ވައިލެޓްފިހި، 26 އަހަރުގެ މުހައްމަދު ވިސާމް ސިދުގީގެ މައްޗަށް ދައުވާ އުފުލައިފިއެވެ.
މި ހާދިސާގައި މަރުވެފައިވަނީ ކަރެކްޝަނަލް އޮފިސަރެއް ކަމަށްވާ ހަސަން ސަމާހެވެ. ސެޕްޓެމްބަރު 6 ވަނަ ދުވަހު ހިނގި މި ހާދިސާގައި ސްޕޯޓްސް ކާރަކާއި ސައިކަލެއް ޖެހުމުން ސައިކަލު ދުއްވަމުންދިޔަ ސަމާހު ނިޔާވިއެވެ.
ގާނޫނުލް އުގޫބާތުގެ 111 ވަނަ މާއްދާގެ ދަށުން، މީހަކު މަރުވެދިއުމުގެ ފަރުވާކުޑަ ޢަމަލެއް ކުރުމުގެ ކުށުގެ ދަޢުވާ ވިސާމްގެ މައްޗަށް އުފުލާފައިވަނީ، ކާރު ދުއްވުމުގެ ލައިސަންސް ނެތި، ހުއްދަކުރެވިފައިވާ ސްޕީޑަށްވުރެ ބާރަށް ދުއްވުމުގެ ސަބަބުން ހިނގި މި ހާދިސާގައެވެ. މި ދަޢުވާ ސާބިތުވެއްޖެނަމަ، އޭނާއަށް 6 މަސްދުވަހުގެ ޖަލު ހުކުމެއް ކަނޑައެޅިދާނެ ކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެއެވެ.
އޮކްޓޯބަރު 22 ވަނަ ދުވަހު ފުލުހުން މި މައްސަލަ ޕްރޮސެކިއުޓަރ ޖެނެރަލްގެ އޮފީހަށް ހުށަހެޅިއެވެ. ނަމަވެސް، އޮކްޓޯބަރު 3 ވަނަ ދުވަހު ބޭއްވުނު އަޑުއެހުމެއްގައި ވިސާމްގެ ވަކީލު ނޫރުއްސަލާމް ވިދާޅުވި ގޮތުގައި، ވިސާމް ކާރު ދުއްވީ ބާރު ސްޕީޑުގައި ނޫނެވެ. އަދި އެކްސިޑެންޓް ހިނގަން މެދުވެރިވީ ވަންވޭއާ ދެކޮޅަށް ސައިކަލު ދުއްވުމުގެ ސަބަބުން ކަމަށް އޭނާ ވިދާޅުވިއެވެ. ފުލުހުން މިކަމާ ދެކޮޅަށް ހެކި ދިން ނަމަވެސް، ފަހުން އާންމުވި މަޢުލޫމާތުތަކުން ވަކީލުގެ މި ވާހަކަތަކަށް ބާރު ލިބިފައިވާ ކަމަށާއި، ވިސާމް ބަންދުކުރެވުނީ އޭރު ފުލުހުން ދިން މަޢުލޫމާތުގެ މައްޗަށް ބިނާކޮށް ކަމަށްވެސް ނޫރުއްސަލާމް ވަނީ ވިދާޅުވެފައެވެ.
ކޮމެންޓު ފޮނުވާ