މުޅި ދުނިޔެއަށް ކުރިމަތިވެފައި މިވާ ސިއްހީ ބޮޑު ކާރިސާއިން އަރައިގަތުމަށް، ފަޤީރު ޤައުމުތަކަށް ވެދޭ އެހީއެއްގެ ގޮތުން، މުއްސަނދި ގައުތަކުން ނަގާފައި ވާ ދަރަނިތައް އަދާކުރުން އަންނަ އަހަރަށް ފަސްކޮށްދިނުމަށް ރާއްޖޭގެ ފަރާތުން ފޮރިން މިނިސްޓަރ ޢަބްދުﷲ ޝާހިދު ވަނީ އދ.ގެ އާންމު މަޖިލީހުގައި ގޮވާލައްވާފައެވެ. ވޯލްޑް ބެންކު ގެ ރައީސް ޑޭވިޑް މަލްޕަސް، ޖަރުމަނުގެ ނޫހަކަށް ދެއްވި އިންޓަވިއުއްގައި ހަމަ މި މޭރުމުން ދަރަނިތައް އަނބުރާދެއްކުން ފަސްކޮށް ދިނުމަށް ވަނީ ދުނިޔެއަށް އިލްތިމާސް ކުރައްވާފައެވެ.
ޖަރުމަނުގެ ނޫހެއްކަމަށް ވާ ހެންޑެލްސްބްލަޓްގައި މިދިޔަ ހޯމަ ދުވަހު ޝާއިޢުކުރި މަލްޕަސްގެ އިންޓަވިއުގައި އޭނާ ވިދާޅުވީ، އޭޕްރީލްމަހު އިންޓަނޭޝަނަލް މަނިޓަރީ ފަންޑު (އައި.އެމް.އެފް) އާއެކު ކުރެވުނު މަސައްކަތް ތަކުން އައި.އެމް.އެފްގެ ދަރަނިތައް އަދާކުރުން ލަސްކޮށްލެވިފައި ވާކަމަށެވެ. އަދި ކުރިއަރާފައި ވާ މުއްސަނދި ޤައުމުތަކުގެ އިތުރުން އަމިއްލަ އިންވެސްޓަރުން ވެސް ފަޤީރު ޤައުމުތަކުގެ ދަރަނިތަކަށް ލުއި ގޮތްތަކެއް ހަމަޖައްސައި ދިނުމަށް އޭނާ ވަނީ ގޮވާލައްވާފައެވެ.
ޕްރައިވެޓް އިންވެސްޓަރުން އެންމެ އެދެވޭވަރަށް މިކަމަށް އަދި އެއްބާރުލުން ނުދޭ. މިއީ ހިތާމަ ކުރާކަމެއް. ހާއްސަކޮށް ޗައިނާއަށް ނިސްބަތްވާ ބޮޑެތި ބައެއް އަމިއްލަ އިންވެސްޓަރުން. މީގެ ސަބަބުން އެހީ ތަކުގެ ރަނަގަޅު ބަދަލު ފެންނަ މިންވަރު ދަށް
– މަލްޕަސް
މިއަހަރުގެ މޭ މަހުން ފެށިގެން ޑިސެމްބަރު މަހާއި ހަމައަށް، ފަޤީރު ޤައުމުތަކާއި ތަރައްގީ ވަމުން އަންނަ ޤައުމުތަކުން ޖީ-20ގެ ޤައުމުތަކަށް ދައްކަންޖެހޭ ދަރަނީގެ 70 އިންސައްތަ އަކީ ޗައިނާއަށް ދައްކަންޖެހޭ ދަރަންޏެވެ. އެއީ 7.17 ބިލިއަން ޑޮލަރެވެ. ޖީ-20 ގެ ޤައުމުތަކަށް ދައްކަން ޖެހޭ ދަރަނި ދެއްކުމުގައި ލުއި ދިނުމަށް އެ ޤައުމުތަކުން ނިންމި ނިންމުމަށް ޗައިނާއިން އެއްބާރުލުން ނުދޭކަމަށް ވޯލްޑް ބެންކާ ހަވާލާދީ ބައެއް މީޑިއާތަކުން ދަނީ ބުނަމުންނެވެ. ޗައިނާގެ ދައުލަތުގެ މީޑިއާ ސީ.ޖީ.ޓީ.އެނުން ބުނާގޮތުގައި ފަޤީރު ޤައުމުތަކާއި ތަރައޤީވަމުން އަންނަ ޤައުމުތައް ހިމެނޭހެން ޖުމްލަ 100 އަށް ވުރެ ގިނަ ޤައުމުން، މިއަހަރުގެ ނިޔަލަށް ޗައިނާއަށް ދައްކަންޖެހޭ ދަރަނި 130 ބިލިއަނަށް ޑޮލަރަށް އަރައެވެ.
މަލްޕަސް ވިދާޅުވީ ދުނިޔޭގެ އިޤްތިޞާދަށް ދިމާވެފައިވާ ގޮންޖެހުންތަކުގެ ސަބަބުން ބައެއް ގައުމުތަކަށް ދަރަނި އަނބުރާ ދެއްކުން މިވަގުތަށް ނާދިރު ކަމަކަށް ވެފައި ވާ ކަމަށެވެ. އެހެންކަމުން ދަރަނި އަދާކުރުން ފަސް ކޮށްލުމުގެ އިތުރުން ބައެއް ކަހަލަ ދަރަނި މަޢާފު ކޮށްދިނުން ނުވަތަ މަދު ކޮށްދިނުން ފަދަ ކަންކަންވެސް ކުރަންޖެހޭ ކަމަށެވެ. ފާއިތުވި ތަނުގައި ދުނިޔެއަށް ދިމާވި މިފަދަ އިޤްތިޞާދީ އަޑިގުޑަން ތަކުން އަރައިގަތުމަށް ވެސް މިފަދައިން އަމަލުކޮށްފައި ވާކަމަށް ވޯލްޑް ބެންކުގެ ރައީސް ވިދާޅުވިއެވެ.
މުޅި ދުނިޔެއަށް ކުރިމަތިވެފައި މިވާ ހާލަތުން އަރައިގަނެވޭނީ މުޅި ދުނިޔެ އެއް އަމާޒަކަށް މަސައްކަތް ކޮށްގެން ކަން ދުނިޔޭގެ އެންމެ ކުރިއަރާފައިވާ ޤައުމުތަކުން ޤަބޫލުކުރާ ކަމަށް މަލްޕަސް ވިދާޅުވިއެވެ. ކޯވިޑް-19އަށް ވެކްސިނެއް ހޯދުމަށް ކުރާ މަސައްކަތަށް، ކުރިއަރާފައިވާ ޤައުމުތަކުން ކުރާ އިންވެސްޓްމެންޓަކީ އޭގެ އެއް މިސާލުކަމަށް މަލްޕަސް ވިދާޅުވިއެވެ.
މިދިޔަ ސެޕްޓެމްބަރު މަހުގެ 29 ވަނަ ދުވަހު އދ. ގެ އާންމު މަޖިލީހުގެ 75 ވަނަ ސެޝަންގައި ތަޤުރީރު ކުރައްވަމުން، ލޯނުތަކާއި ދަރަނި ދެއްކުން އަންނަ އަހަރުގެ ނިޔަލަށް ފަސްކޮށްދެވުމަށް ދުނިޔޭގެ ކުރިއަރާފައިވާ ޤައުމުތަކަށް ރާއްޖޭގެ ފޮރިން މިނިސްޓަރ ޝާހިދު ގޮވާލެއްވިއެވެ. ޝާހިދު ވިދާޅުވީ ކޮވިޑް-19ގެ އަސަރު އެކި ޤައުމުތަކަށް ކޮށްފައި ވަނީ އެކި މިންވަރަށް ކަމަށެވެ. އެގޮތުން ޓެކްނޮލޮޖީގެ ރޮނގުން ޤައުމުތަކުގެ މެދުގައިވާ ފަރަޤާއި، ދަތުރުފަތުރު ހުއްޓުމަކަށް އައުމުން އިޤްތިޞާދަށް ލިބުނު ގެއްލުންތަކަކީ، ދުނިޔޭގެ ނާރެހުން ކޮންމެ ދިމާލަކަށް ނަޒަރު ހިންގާލިޔަސް، މިއަދު ކުރިމަތިލާންޖެހިފައިވާ ހަޤީޤަތް ކަމަށް މިނިސްޓަރ ވިދާޅުވިއެވެ.
އެހެން ނަމަވެސް މިއީ ހުރިހާ ގައުމަކަށް އެއްވަރަކަށް ލިބުނު ގެއްލުންތަކެކޭ ދެންނެވޭކަށް ނެތް
– ޝާހިދު
ދުނިޔެއިން ބަނޑުހައިހޫނުކަން ނައްތާލުމަށް ވޯލްޑް ބެންކުން ކުރަމުންދާ މަސައްކަތަށް ވެސް ކޯވިޑް-19ގެ ސަބަބުން ވަނީ ބޮޑެތި ގޮންޖެހުންތަކަކާއި ކުރިމަތިލާން ޖެހިފައެވެ. ވޯލްޑް ބެންކުގެ ރިޕޯޓުތައް ދައްކާގޮތުން މިއަހަރުގެ ނިޔަލަށް 100 މިލިއަނެއްހާމީހުން ބަނޑަށް ޖެހޭނެއެވެ. އަދި 2021 ވަނަ އަހަރު ބަނޑަށް ޖެހޭ (ދުވާލަކު 1.90 ޑޮލަރު ނުލިބޭ) މީހުންގެ އަދަދު 150 މިލިއަނަށް އަރާނެކަމަށް އެއިދާރާއިން ލަފާކުރެއެވެ. މާނައަކީ ދުނިޔޭގެ އާބާދީގެ 1.4 އިންސައްތަ މީހުންނަކީ 2021 ވަނަ އަހަރުގެ ނިޔަލަށް ބަނޑަށް ޖެފިފައިވާ މީހުނަށް ވާނެއެވެ.
