ވެރިކަމަށް ވަޑައިގެންނެވީ ރައްޔިތުންނަށް ހިދުމަތް ކުރެއްވުމަށް ކަމަށާއި އެމަނިކުފާނަކީ "މަވެތިކަން" އިސްކުރައްވާނެ ސިޔާސީ ލީޑަރަކަށް ވެވަޑައިނުގަންނަވާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ޖުމްހޫރީ ދުވަހުގެ މުނާސަބަތުގައި ދަރުބާރުގޭގައި ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ ވެރިކަމަށް ވަޑައިގެން ބަދަލު ހިފުމުގެ ރޫހުގައި ކުރެއްވި އެއްވެސް ކަމެއް ނޯންނާނެ ކަމަށެވެ. އެކަމަކު، މީގެކުރިން ހިނގި ވެރިކަންތަކުގައި ސިޔާސީ ބޭފުޅުންނަށް އަމާޒުކޮށް ބަދަލު ހިފުމުގެ ރޫހެއް ގެންގުޅުނު ކަމަށް ވިދާޅުވިއެވެ.
"ބަދަލު ހިފުމުގެ ރޫހް ނައްތާލައިފިން. ސިޔާސީ ގޮތުން ސަރުކާރުން ބަދަލު ހިފުމުގެ ރޫހުގައި ކަންކުރާ ތަނެއް ނުފެންނާނެ. ސިޔާސީ މީހަކަށް ވީތީ އަޅުގަނޑުގެ ވާދަވެރިޔާ ހިފައި ހައްޔަރުކޮށް ޖަލަށް ލީ ތަނެއް ނުފެންނާނެ. ކުރިއަށް އޮތް ތަނުގައި ވެސް ނުފެންނާނެ. އެއީ، އަޅުގަނޑު ގަބޫކުރާ ހަމައަކީ،" ރައީސް ވިދާޅުވިއެވެ.
ރިޔާސީ ކޮމިޝަންތައް ހަދައިގެން ކުރީގައި އެ ކޮމިޝަންތަކަށް ވަދެގެން ކަންކަން ކުރާ ގޮތަށް މި ސަރުކާރުން އަމަލު ނުކުރާނެ ކަމަށް ރައީސް ވިދާޅުވިއެވެ. އެކަމަކު، ވައްކަންކޮށްފައި ހުރެއްޖެ ނަމަ، ނުވަތަ ގައުމުގެ މުދާ ނުހައްގުން ހޯދާފައި ހުރި ނަމަ، އެކަންކަން ބަލާނެ ކަމަށް އެމަނިކުފާނު ވިދާޅުވިއެވެ.
އަދި ރައްޔިތުންގެ ހައްގަކަށް އަރައިގެންފައި އޮތް ނަމަ، އޮންނަ އުސޫލުގެ ތެރެއިން އެކަންކަން ވެސް ބަލާނެ ކަމަށް ރައީސް ވިދާޅުވިއެވެ.
"ރިޔާސީ ކޮމިޝަނެއް ނަހަދާނެ. މިނިވަން މުއައްސަސާތައް އެބަހުރި. ދުސްތޫރީ ނިޒާމު އެބައޮތް. ޝަރުއީ ނިޒާމު އެބައޮތް. ނިޒާމުގެ ތެރެއިން އެކަންކަން ބެލޭނެ. ކުރީގައި ފެނުނު ގޮތަށް އެކި ކަހަލަ ކޮމިޝަންތައް ހަދައިގެން ސިޔާސީ ގޮތުން މީހުންގެ ފަހަތުން ދުވެ ގައުމުގެ ހަމަޖެހުން ނަގާލައި ބަދަލު ހިފުމުގެ ރޫހު ގެނައުން އެއީކީ ރައްޔިތުން އެދޭ ގޮތެއް ނޫން. އަޅުގަނޑު ވައުދުވީ އެކަން ހަމައަކަށް އަޅުވަން، ގައުމަށް ހަމަޖެހުން ގެންނަން. ވައުދުވީ ގޮތަށް ވައުދު މިދަނީ ފުއްދަމުން،" ރައީސް ވިދާޅުވިއެވެ.
ރައީސް ވިދާޅުވީ ރައްޔިތުން އެމަނިކުފާނާ ހަވާލުކުރި ޒިންމާ އަދާކުރުމުގައި ކޮންމެ ހިނދުކޮޅެއް ވެސް ހޭދަކުރަނީ ރައްޔިތުން ހަވާލުކުރީ ވަރުގަދަ ޒިންމާއެއްކަން ގަބޫލުކޮށްގެން ކަމަށެވެ. އެގޮތުން އެމަނިކުފާނާއި، ވަޒީރުންނާއި ރައްޔިތުންގެ މަޖިލީހުގެ މެމްބަރުންނާއި ކުންފުނިތަކުގެ ވެރިން ފަދަ ބޭފުޅުން ކުރައްވަނީ އެ މަސައްކަތް ކަމަށް ވިދާޅުވިއެވެ.
ރައީސް ވިދާޅުވީ މި ވެރިކަމަށްވީ އެއް އަހަރުގައި މަސައްކަތްކުރެއްވީ ރައްޔިތުންގެ ފަޅީގައި ހުންނަވައިގެން ކަމަށާއި ގިނަ ދުވަސްތަކެއް ވަންދެން އަތްނުލާ ހުރި ބޮޑެތި މައްސަލަތައް ހައްލުކުރެވޭތޯ ބަލަމުން އަންނަނީ އެހެންވެ ކަމަށެވެ. އެގޮތުން ޑުރަގްގެ މައްސަލަތަކާއި، ގޭންގު މާރާމާރީއާއި، ވޭޕު މަނާކުރުމާއި މެޑިކަލް މާފިއާއާއި ޑޮލަރުގެ ކަޅު ބާޒާރުގެ މައްސަލަ ހައްލުކުރަން މަސައްކަތް ފެއްްޓެވީ އެހެންވެކަމަށް ރައީސް ވިދާޅުވިއެވެ.
ރައީސް ވިދާޅުވީ، އެމަނިކުފާނަށް ނިސްބަތްކޮށް ބައެއް މީހުން އެއީ "ސިޔާސީ މީހެއް" ނޫން ކަމަށް ބުނާ ކަމަށެވެ. ނަމަވެސް، ސިޔާސީ މީހަކަށް ނުވަތަ ވެރިއަކަށް ވުމަކީ އަމިއްލައަށް ބޭނުންވާ ގޮތް އިސްކޮށް، ރައްޔިތުން މަތިން ހަނދާން ނައްތާލުންތޯ ރައީސް ސުވާލު ކުރައްވައިފައެވެ.
"ސިޔާސީ މީހަކަށް ވުމަކީ ތިމަންނަ ބޭނުންވާ ގޮތް އިސްކޮށް، މަވެތިކަން އިސްކޮށް، ރައްޔިތުން މަތިން ހަނދާން ނައްތާލައި، އޭނަގެ ހުރިހާ މަސްލަހަތެއް އިސްކުރުން ކަމަށްވަންޏާ އަޅުގަނޑު އެކަހަލަ ސިޔާސީ މީހަކަށް ވާކަށް ބޭނުމެއް ނޫން. ފަޚުރުވެރިކަމާ އެކީގައި މިއީ އެކަހަލަ ސިޔާސީ މީހެއް ނޫން" ރައީސް ވިދާޅުވިއެވެ.
