ލުއި ލޯނު ސްކީމް "ހިޔާވެހި ފައިނޭންސް" އަށް މިއަދުން ފެށިގެން ލޯނަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.
ގެދޮރު އިމާރާތްކުރުމަށް މާލީ ގޮތުން ދަތިވާ ފަރާތްތަކަށް ލުއިފަސޭހަ ގޮތްތަކެއް ހޯދައިދިނުމަށް މުޅި ރާއްޖެއަށް އަމާޒުކޮށްގެން އިސްލާމިކް ޝަރީޢާގެ އުސޫލުތަކާ އެއްގޮތަށް މި ލޯނު ސްކީމް ވަނީ 5 ނޮވެމްބަރ 2024 ގައި އިފްތިތާޙްކޮށްފައެވެ.
ހައުސިން، ލޭންޑް އެންޑް އަރބަން ޑިވެލޮޕްމަންޓް މިނިސްޓްރީން މަޢުލޫމާތު ދެއްވާފައިވާ ގޮތުގައި މި ސްކީމަށް އެޕްލިކޭޝަން ހުށަހެޅުމަށް ހަމަޖެހިފައިވަނީ ހިޔާވެހި ޕޯޓަލް މެދުވެރިކޮށެވެ. އެޕްލިކޭޝަން ހުށަހެޅުމުގެ ފުރުސަތު ހުޅުވާލާފައިވަނީ 6 މަސްދުވަހުގެ މުއްދަތަށް ކަމަށްވާއިރު، ހުށަހެޅުމުގެ ފުރުސަތު ފެށިގެން މިދަނީ 8 ނޮވެމްބަރު 2024 އިން ފެށިގެންނެވެ. އަދި އެޕްލިކޭޝަން ހުށަހެޅުމުގެ އެންމެ ފަހު ސުންގަޑިއަކީ 8 އޭޕްރީލް 2025 ވާ އަންގާރަ ދުވަހުގެ ރޭ 23:59 އެވެ.
މިނިސްޓްރީން އިތުރަށް އަންގަވާފައިވާ ގޮތުގައި، މި ޕްރޮގުރާމާ ގުޅޭގޮތުން އިތުރު މަޢުލޫމާތު ސާފުކުރައްވަން ބޭނުންފުޅުވާ ފަރާތްތަކަށް ހިޔާވެހި ޕޯޓަލް މެދުވެރިކޮށް ސުވާލު ހުށަހެޅުމުގެ ފުރުސަތު ވަނީ ހަމަޖައްސާފައެވެ.
