ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ހަސަން ޒަރީރުގެ ބޮލުގައި މަރުތޭލަކުން ޖަހައި ދިން ހަމަލާގެ މައްސަލައިގައި ދަޢުވާ ކުރެވުނު އިބްރާހިމް ޢަބްދުﷲ (ގައްބަރޭ) އާއި އިތުރު ދެ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން އިއްޔެ ހުކުމް ކޮށްފިއެވެ.
މިދިޔަ އަހަރުގެ މެއި މަހު މާލޭގެ ކެފޭއެއްގައި ހިނގި މި ހާދިސާގައި ޒަރީރުގެ ބޮލަށް މަރުތޭލަކުން ހަމަލާދިނުމުގެ ސަބަބުން އޭނާގެ ބޮލަށް ވަރަށް ބޮޑެތި އަނިޔާތަކެއް ލިބުނެވެ. މި މައްސަލައިގައި ދަޢުވާ އުފުލާފައިވަނީ މއ. ނައިޓްވިލާ އިބްރާހިމް ޢަބްދުﷲ (ގައްބަރޭ)، ތ. ކިނބިދޫ ދީފްރަމްގޭ އަޙްމަދު އަވްޝަމް އަދި މ. ތާޖް މުލާއިމް މުޙައްމަދުގެ މައްޗަށެވެ.
ކޯޓުން މި މައްސަލަ ނިންމުމުގައި ބުނެފައިވަނީ، ދައުލަތުން ހުށަހެޅި ހެކިންގެ ހެކިބަހުންނާއި ވީޑިއޯ ފުޓޭޖްތަކުން މި ހަމަލާގައި އެ ތިން މީހުން ބައިވެރިވިކަން އެއްވެސް މިންވަރަކަށް ސާބިތުނުވާ ކަމަށެވެ. އަދި ވީޑިއޯ ފުޓޭޖްތަކުން އެ މީހުންކަން ކަށަވަރު ނުކުރެވޭ ކަމަށްވެސް ކޯޓުން ވަނީ ފާހަގަކޮށްފައެވެ.
މި މައްސަލައިގައި ދަޢުވާ ލިބުނު ގައްބަރޭއަކީ 2007 ވަނަ އަހަރު މާލޭގައި ހިނގި މަރުގެ މައްސަލައެއްގައިވެސް ތުހުމަތުކުރެވުނު މީހެކެވެ. ނަމަވެސް އެ މައްސަލައިގައިވެސް އޭނާގެ މައްޗަށް ކުށް ސާބިތުވެފައެއް ނުވެއެވެ.
