ރާއްޖޭގެ ކޯޓުތަކުގައި މަދަނީ މައްސަލަތައް ލަސްވާތީ ޖުޑީޝަލް ސާވިސް ކޮމިޝަނުން އިސްނަގައިގެން، މަދަނީ އިޖުރާއާތުގެ ޤާނޫނަށް އިޞްލާޙު ގެނައުމުގެ ބިލެއް ބަންޑާރަނައިބުގެ އޮފީހަށް ފޮނުވައިފިއެވެ.
ޖޭއެސްސީން ބުނީ 2021 ވަނަ އަހަރުގެ ޑިސެންބަރު 16ގައި ތަސްދީގުކޮށް، އޭގެ ހަ މަސް ފަހުން ގާނޫނަށް އަމަލުކުރަން ފެށުމާ އެކު ރާއްޖޭގެ ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތައް ލަސްވެ އަދި މައްސަލަތަކުގެ ޙުކުމްތައް ތަންފީޒު ނުވެ މުޅި ނިޒާމަށް މިއިން ދުވަހަކު ކުރިމަތި ނުވާ ވަރުގެ ދަތިތައް ކުރިމަތިވެފައިވާ ކަމަށެވެ.
އެގޮތުން ބޭންކުތަކާއި ވިޔަފާރި އިންސްޓިޓިއުޝަންތައް އަދި ޢާއްމު ރައްޔިތުންގެ ވިޔަފާރިތައް ހުއްޓި، މަދަނީ ޢަދުލުގެ ނިޒާމަށް ކުރިމަތިވެފައިވާ މައްސަލަތަކަށް ޙައްލެއް ހޯދެން އޮތީ މިހިނދުން މިހިނދަށް ޤާނޫނަށް އިޞްލާޙުތަކެއް ގެނެވިގެން ކަމަށް ކަމަށް ޖޭއެސްސީން ބުނެއެވެ.
އެގޮތުން ޤާނޫނުއަސާސީ އާއި، އިންޓަނޭޝަނަލް ބެސްޓް ޕްރެކްޓިސްއާ އެއްގޮތަށް، މަދަނީ އިޖުރާއާތުގެ ޤާނޫނަށް ގެންނަން ފެންނަ އިޞްލާޙުތައް ބަންޑާރަނައިބުގެ އޮފީހަށް ފޮނުވާފައިވާ ކަމަށް އެ ކޮމިޝަނުން ބުނެއެވެ.
"ބަންޑާރަނައިބު މެދުވެރިކޮށް މި ގާނޫނު އިސްލާހުކުރުމުގެ ބިލު، ރައްޔިތުންގެ މަޖިލީހުގެ އިދާރާއަށް ފޮނުވުމަށް މިދިޔަ ހޯމަ ދުވަހު ބޭއްވުނު ކޮމިޝަންގެ 57 ވަނަ ޖަލްސާއިން ނިންމަވާފައިވާތީ، މިއަދު މި އިސްލާހުތައް ބަންޑާރަނައިބުގެ އޮފީހަށް ވަނީ ހުށަހަޅާފައި،" ޖޭއެސްސީން ބުނެއެވެ.
