ހައްޖު ކޯޕަރޭޝަނުން ކ. މާފުށީގައި ހަލާލް ޓޫރިޒަމް ތަޢާރަފުކުރަން ނިންމައިފިއެވެ. ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި ވާހަކަދައްކަވަމުން، ހައްޖު ކޯޕަރޭޝަންގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެފައިވަނީ، އެ ކުންފުނީގެ އަމާޒަކީ ހަރަދުތައް ކުޑަކޮށް ފައިދާވާ ކުންފުންޏަކަށް ހެދުމާއި އާމްދަނީ އިތުރުކުރުން ކަމަށެވެ.
މި މަޤްސަދުގައި މާފުށި ކައުންސިލްގެ ކުންފުންޏާ ގުޅިގެން އުފައްދާ ސަބްސިޑަރީ ކުންފުންޏަކުން އެ ރަށުގައި ސިޓީ ހޮޓަލެއް އަޅައި "ހަލާލް ޓޫރިޒަމް" ތަޢާރަފްކުރުމަށް ނިންމާފައިވާ ކަމަށާއި، އެކަމަށް ބޭނުންވާ ބިން ވެސް މިހާރު ހަމަޖެހިފައިވާ ކަމަށް ޝަކީލް ވިދާޅުވެފައިވެއެވެ. މިހާރުވެސް އިންވެސްޓްކުރާނެ ފަރާތްތަކުން ކުންފުންޏާ ގުޅިފައިވާއިރު، މާފުއްޓަކީ ޓޫރިޒަމަށް އެސްޓަބްލިޝްވެފައިވާ ތަނަކަށްވާތީ، މިއީ ރިސްކު ކުޑަ އަދި ރަނގަޅު އާމްދަނީއެއް ބޭރު ފައިސާއިން ލިބޭނެ މަގެއްކަމަށް ޝަކީލް ފާހަގަކުރައްވައިފައިވެއެވެ.
މީގެ އިތުރުން، ހުޅުމާލޭގައި ލަގްޒަރީ އެޕާޓްމެންޓް އަޅައި ވިއްކުމަށް ނިންމާފައިވާ ކަމަށާއި، ކުރިއަށް އޮތް ދެތިން މަސް ތެރޭގައި ބަޔަކާ ހަވާލުކޮށް އިމާރާތްކުރުމުގެ އަމަލީ މަސައްކަތް ފަށާނެ ކަމަށްވެސް ޝަކީލް ވިދާޅުވެފައިވެއެވެ. ރާއްޖެއިން ހައްޖަށް މީހުން ގެންގޮސްދޭ އަގު ކުޑަކުރުމަށް ހައްޖު ކޯޕަރޭޝަނުން މަސައްކަތްކުރަމުން ދާއިރު، ސަރުކާރުން ވަނީ ޙައްޖަށް މީހުން ގެންދަން ލިބޭ ހުރިހާ ކޯޓާއެއް އެ ކުންފުންޏަށް ދޭން ނިންމައިފައެވެ.
