ނުހައްގު މުއްސަނދިކަން ހޯދުން ހުއްޓުވުމަށް ގާނޫނުލްއުގޫބާތަށް އިސްލާހު ގެނައުމަށް ރައީސް ޑރ. މުހައްމަދު މުއިއްޒު ނިންމެވި ނިންމެވުމަކީ ދައުލަތުގެ ތެރޭގައި އޮތް ޒަމާންވީ ކޮރަޕްޝަންގެ މައްސަލަ ހައްލުކުރެވޭނެ، އަދި އެކަމުގެ ނިޔަތާއި އަޒުމް ސާފުކޮށް ފެންނަ އިސްލާހެއް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ. ގާނޫނުލް އުގޫބާތަށް ގެންނަ އިސްލާހަކީ ދައުވާކޮށްފިއްޔާ ސާބިތު ނުވާ ގޮތަށް، އަދި ކަންކުރުމުގެ ނިޔަތް ނެތި ލިޔެފައި އޮތް މާއްދާއެއް ކަމަށް، އޭނާ ވިދާޅުވި އެވެ.
ރައީސް ޑރ. މުއިއްޒު މިގެންނަވަން ނިންމެވި އިސްލާހަކީ ދައުލަތްތެރޭ އޮތް ޒަމާންވީ ކޮރަޕްޝަންގެ މައްސަލަ ހައްލުކުރެވޭނެ އަދި އެނިޔަތާއި އަޒުމް ފެންނަ އިސްލާހެއް.
އިހުސާން ވިދާޅުވެފައި ވެއެވެ.
ރައީސް އިއްޔެ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ ގާނޫނުލްއުގޫބާތުގެ 515 ވަނަ މާއްދާއަށް މި ގެނެވޭ އިސްލާހަކީ ރައީސާއި، މިނިސްޓަރުންނާއި، ރައްޔިތުންގެ މަޖިލީހުގެ މެންބަރުންނާއި، ފަނޑިޔާރުންނާއި، ދައުލަތުގެ މުވައްޒަފުންނާއި، އަދި ކުރީގެ ދައުލަތުގެ މުވައްޒަފުން ހޯދަމުންދާ ނުވަތަ ހޯދާފައިވާ ނުހައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ ކަމެއް ކަމަށެވެ.
މިކަމާ ގުޅިގެން އިހުސާން ވިދާޅުވެފައިވަނީ މިހާރު އޮތް ގާނޫނުގައި އެ މާއްދާ ލިޔެފައި އޮތީ އެ ވާހަކަ ގަދައަށް ދައްކާފައި، އެއްވެސް މީހެއްގެ މައްޗަށް ދައުވާ ނުކުރެވޭ ގޮތަށް ކަމަށާއި، ދައުވާކޮށްފިނަމަ ސާބިތު ނުވާ ގޮތަށް، އަދި ކަންކުރުމުގެ ނިޔަތް ނެތި ލިޔެފައި އޮތް މާއްދާއެއްގެ ގޮތުގައި ކަމަށެވެ.
