އެމްއެމްސީގެ ނޫސްވެރިކަމުގެ އެވޯޑްސް ޙަފްލާގައި މިއަހަރުގެ ލައިފްޓައިމް އެޗީވްމަންޓް އެވޯޑް ރާއްޖޭގެ ނޫސްވެރިކަމުގެ ދާއިރާގައި އިސްކޮށް ހަރަކާތްތެރިވެވަޑައިގެންނެވި ދެ ބޭފުޅަކަށް ދީފިއެވެ. އެއީ "އާފަތިސް" ނޫހުގެ ކުރީގެ އެޑިޓަރު އަހްމަދު ޒާހިރު (ފެއަރީ ޒާހިރު) އާއި "ދައުރު" ނޫހުގެ އެޑިޓަރު މޫސާ ލަތީފެވެ.
ނޫސްވެރިކަމުގެ ދާއިރާއިން ސަރުކާރުން ދެއްވާ ހިތްވަރު ދިނުމުގެ ގައުމީ އިނާމާއި ޝަރަފުވެރިކަމުގެ ގައުމީ އިނާމުގެ އިތުރުން ނޫސްވެރިކަމުގެ ރަން ގަލަމާއި އަލިމަސް ގަލަން ހާސިލުކުރައްވާފައިވާ މޫސާ ލަތީފަކީ ނޫސްވެރިކަމުގެ ރޮނގުން މެލޭޝިއާއިން ފުރަތަމަ ޑިގްރީ ހާސިލުކުރައްވާފައިވާ ބޭފުޅެކެވެ. އޭނާ ވަނީ ހަވީރު އަދި މިހާރު ނޫހުގައި ނޫސްވެރިއެއްގެ ގޮތުންނާއި އެޑިޓަރެއްގެ ގޮތުން މަސައްކަތްކުރައްވާފައެވެ. މިހާރު އޭނާ ހުންނެވީ "ދައުރު" ނޫހުގެ އެޑިޓަރެއްގެ މަޤާމުގައެވެ.
ނޫސްވެރިކަމުގެ ދާއިރާއިން ސަރުކާރުން ދެއްވާ ހިތްވަރު ދިނުމުގެ ގައުމީ އިނާމާއި އެމްއެމްސީން ދެއްވާ ނޫސްވެރިކަމުގެ ރަން ގަލަން ހާސިލުކުރައްވާފައިވާ ފެއަރީ ޒާހިރަކީ ސަރުކާރުގެ ޒިންމާދާރު މަޤާމުތަކެއްގައި މަސައްކަތްކުރައްވަމުން "ހަފުތާ" އަދި "އާފަތިސް" ނޫހަށް ލިޔުއްވަމުން ގެންދެވި ބޭފުޅެކެވެ. އަދި އޭނާ ވަނީ "އާފަތިސް"، "ޖަމާއަތުގެ ޚަބަރު" އަދި "ހޮޅުއަށި" ނޫހުގެ އެޑިޓަރުކަންވެސް ކުރައްވާފައެވެ.
ލައިފްޓައިމް އެޗީވްމަންޓް އެވޯޑަކީ މީޑިއާ ކައުންސިލުން ނޫސްވެރިކަމުގެ ދާއިރާގައި ގިނަ އަހަރުތަކަކު މަސައްކަތްކުރައްވާފައިވާ ބޭފުޅުންގެ ޚިދުމަތުގެ އަގުވަޒަންކުރުމުގެ ގޮތުން ދޭ އެވޯޑެކެވެ.
