ސަރުކާރުން މާލެ އާއި ހުޅުމާލެ އާ ދެމެދު ޓެކްސީ ހިދުމަތް ދިނުމަށް ލައިނެއް ހެދުމުގެ މަސައްކަތް ހުއްޓުވައިދިނުމަށް ޓެކްސީ ޑްރައިވަރުން ރައްޔިތުންގެ މަޖިލީހުގެ އިގްތިސާދީ ކޮމިޓީގައި އެދިއްޖެއެވެ.
މިއީ ޓްރާންސްޕޯޓް މިނިސްޓްރީން "މާލެ ފެހި" ޕްރޮގްރާމްގެ ދަށުން ޓެކްސީގެ ވިޔަފާރީގެ ތެރެއަށް ވަނުމަށް ނިންމި ނިންމުމަކާ ގުޅިގެން، ޑްރައިވަރުންގެ ޖަމިއްޔާއިން މިއަދު ކޮމިޓީއަށް ހާޒިރުވެ ފާޅުކުރި ކަންބޮޑުވުމެކެވެ.
ޑްރައިވާސް އެސޯސިއޭޝަންގެ މެންބަރު ހަސަން ޒަރީރު ވިދާޅުވެފައިވަނީ މިއީ ޑްރައިވަރުންގެ ދިރިއުޅުމާ ސީދާ ގުޅިފައިވާ މައްސަލައެއް ކަމަށާއި، އޮގަސްޓް މަހު ޓްރާންސްޕޯޓް މިނިސްޓަރު މުހައްމަދު އަމީން ޑްރައިވަރުންނާ ބައްދަލުކުރައްވައި، ސަރުކާރުން ޓެކްސީ ހިދުމަތުގެ ތެރެއަށް ނުވަންނާނެ ކަމަށް ވިދާޅުވެފައިވާ ކަމަށެވެ. އަދި ސަރުކާރުން މި ހިދުމަތުގެ ތެރެއަށް ވަދެއްޖެނަމަ، މިހާރު ހިދުމަތް ދެމުންދާ ކުންފުނިތަކުގެ އިންވެސްޓްމަންޓްތަކަށް ހުރަސްއެޅި، އެފަރާތްތަކުގެ ވިޔަފާރިތަކަށް ބޮޑެތި ގެއްލުންތަކެއް ލިބޭނެ ކަމަށް ޒަރީރު ފާހަގަކުރެއްވިއެވެ.
ނަމަވެސް ޓްރާންސްޕޯޓް މިނިސްޓަރު އަމީން ވިދާޅުވެފައިވަނީ މި ދާއިރާގެ ތެރެއަށް ސަރުކާރުން ވަދެ، އުސޫލުތަކާއި ގާނޫނުތަކެއް އެކުލަވާލައިގެން ކޮންޓްރޯލް ނެގުމަކީ މުހިންމު ކަމެއް ކަމަށެވެ. އެހެން ނޫންނަމަ ވެހިކަލްތަކުން މާލެ "ބަންޑުންވާ" ހިސާބަށް ގޮސް، މިހާރުވެސް ރައްކާތެރިކަން ގެއްލިފައިވާ ކަމަށް މިނިސްޓަރު ފާހަގަކުރެއްވިއެވެ.
