ރިޔާސީ އަހަރު ފެށޭ ދުވަސް ނޮވެމްބަރު 11 އަށް ބަދަލުކުރުމަށް ގާނޫނުއަސާސީއަށް އިސްލާހެއް ހުށަހަޅުއްވާނެ ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެއެވެ. މިކަން އެޓާނީ ޖެނެރަލް ހާމަކުރެއްވީ މިއަދު ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައެވެ.
މި އިސްލާހަކީ ޕަބްލިކް ރެފެރެންޑަމަކަށް ދާންޖެހޭ ބާވަތުގެ އިސްލާހަކަށް ވުމާއެކު، މިކަމަށް ވަގުތު ބޭނުންވާނެ ކަމަށް އުޝާމް ފާހަގަކުރެއްވިއެވެ. ރާއްޖޭގެ ޖުމްހޫރީ ދުވަހަކީ ނޮވެމްބަރު 11 ކަމުގައިވީ ނަމަވެސް، 2013 ގައި ސުޕްރީމް ކޯޓުން ރިޔާސީ އިންތިޚާބުގެ ފުރަތަމަ ބުރު ބާތިލުކުރުމާ ގުޅިގެން، އޭރުގެ ރައީސް ޔާމީން ހުވާކުރެއްވީ ނޮވެމްބަރު 17 ގައެވެ. އެއަށްފަހު ރިޔާސީ ދައުރު ގުނަމުން އައީ ނޮވެމްބަރު 17 އިން ފެށިގެންނެވެ.
މީގެ އިތުރުން، ސަރުކާރުން އެސެޓް ރިކަވަރީ ބިލާއި، ރާއްޖޭގެ ސަރަހައްދު ކަނޑައެޅުމާބެހޭ ބިލާއި، މަޖިލިސް މެންބަރުންގެ ރީކޯލް ވޯޓާބެހޭ އިސްލާހުގެ އިތުރުން ވެރިކަމުގެ ނިޒާމާ ގުޅޭ އިސްލާހުތަކެއްވެސް ހުށަހަޅުއްވާނެ ކަމަށް އުޝާމް ވިދާޅުވިއެވެ. އެޓާނީ ޖެނެރަލް އިތުރަށް ވިދާޅުވީ، މި އިސްލާހުތައް ފުރަތަމަ ނިންމީ އެއްފަހަރާ ހުށަހެޅުމަށް ކަމުގައިވީ ނަމަވެސް، ބައެއް ބިލުތަކަކީ ރައްޔިތުންގެ ޚިޔާލު ހޯދުމާއި އިތުރު މަރުހަލާތަކެއް ފުރިހަމަކުރަންޖެހޭ އިސްލާހުތަކަކަށް ވުމާއެކު، މިހާރު ވަނީ ތިން ފިޔަވައްސަކަށް ބަހާލައިގެން ކުރިއަށް ގެންދިއުމަށް ނިންމާފައެވެ.
